Tekst: HANNE KULLERUD NIELSEN/hanne@lomedia.no

Foto: HÅVARD SÆBØ/has@lomedia.no

STORD: På Moglegheitskafeen i Leirvik kan dei mange arbeidslause i Sunnhordland treffe andre i same båt, og få innspel på vegen mot arbeid. Kaféen er open eit par timar kvar torsdag og starta i januar. Nettverkbyggjing er målet. For dei aller fleste jobbane kjem ikkje til Nav. Dei ligg berre ute på den skjulte arbeidsmarknaden, og vert tildelt kjenningar og folk som er i direkte kontakt med verksemdene.

Sjå korleis du kan finne dei «skjulte» jobbane nederst i saken!

Frustrerande nedturar

På ein av dei første Moglegheitskaféane treff vi ein ingeniør som har lang erfaring med å leie store prosjekt i oljebransjen. Han vil ikkje ha navn og bilete i bladet, men fortel at han har vore heilt utan arbeid i snart eitt år. Gode referansar og skussmål har han. Søknad etter søknad har han sendt, og vorte innkalla til intervju etter intervju.

– Men eg var berre så langt frå å få jobbane, seier han, og syner fram to fingrar med berre ein millimeter mellom.

Om han har vore viljug til å flytte på seg?

– Sjølvsagt. Eg har jo budd i ein bag i over 20 år!

• Dette er snittlønna i over 300 yrker

Skamkjensle

På ei lita scene i lokalet er Birgit Bratseth i gong med eit levande foredrag om hva ho og organisasjonen Karriere Sunnhordland kan gjere for arbeidslause og kva dei arbeidssøkande sjølv må yta for å få seg jobb. Ho seier at det er mange måtar å reagere på når ein mister arbeidet. Mange kjenner på både skam, sorg, sinne og frustrasjon. Og det kan ta litt tid å kome vidare etter sjokket. Nokre vil utvikle psykiske problem som angst og depresjon.

Bratseth peiker på at det er viktig at den arbeidslause tek vare på seg sjølv. Det kan hjelpe å finne andre gjeremål som kan erstatte den sosiale arenaen jobben òg har vore. Det er umåteleg viktig å ikkje isolere seg, men halde kontakten med familie og vener, og ikkje miste strukturen i kvardagane, men syte for å ha meiningsfulle ting å gjere kvar dag.

Øve på jobbintervju

Ved sida av scena sit to unge karar som vurderer tilbodet frå Karriere Sunnhordland om mellom anna trening i intervjuteknikk. Tom Erik Engelsen tok svennebrev som tømrar i desember, og Frank Vågnes tok fagbrevet i IKT i august. Begge hadde læretida i kommunen, men der var det ikkje arbeid til dei etterpå. Kameratane håper dei kan få seg jobb snart, og er glade for at dei enno kan bu heime hjå foreldra sine.

• Disse 27 yrkene gikk ned i lønn i fjor

Har lita tru på ny jobb

59 år gamle Else Bukkøy høyrer på korleis det skal gjerast, men seier at ho trur det vert vanskeleg å finna seg nytt arbeid. Ho har jobba med økonomi og reknskap hjå Frontica Business Solutions på Stord, men vart arbeidslaus saman med rundt 30 andre då verksemda vart seld til utlandet.

– Eg hadde rekna med at eg kunne stå til eg vart 62. Slik vart det ikkje. No har eg søkt på alle slags jobbar. Men vi er mange om beinet, sukkar ho, og fortel at ho takkar ja til alle Nav-kurs for å ha noko å fylle dagane med.

• Dette får du av LO hvis du blir arbeidsledig