Øystein Windstad

oystein.windstad@lomedia.no

Måndag kom beskjeden om at 127 av rundt 600 faste tilsette blir permitterte på ubestemt tid hos Institutt for energiteknikk, IFE. Situasjonen og permitteringane fører til at atomreaktorane på Kjeller og Halden blir stengt midlertidig.

Styret skal spare minst 10 millionar kroner i løpet av 2016:

– Eg meiner det er feil virkemiddel å permittere, det vil ikkje løyse situasjonen. Fagforeiningane har spela inn å heller utsette virkningane av lønsoppgjeret for 2016 til 1. januar 2017, utan krav om etterbetaling. Slik kan ein spare like mykje som å permittere 127, seier Pål Kjærstad, tillitsvalt i NTL Kjeller og vararepresentant i styret til IFE.

Vil ha meir fokus på salg og økonomioppfølging

Kjærstad meiner det viktigaste som må til for å snu den økonomisk vanskelege situasjonen er eit anna fokus:

– Vi må få leiinga til å jobbe og fokusere meir på salg, marknadsføring og realistiske budsjett. Å utsette lønsoppgjeret ville ha frigjort tid slik at leiinga kunne ha fokusert meir på marknadsføring og salg av prosjekt, meiner Kjærstad. Han peikar også på at permitteringar er venta å ville føre til lågare produktivitet og dårlegare arbeidsmiljø.

Nedgang i oljesektoren

At det har blitt mindre oppdrag for IFE blir knytta til at dårlege tider i oljebransjen. I fjor omsette IFE for rundt ein milliard kroner. Instituttet finansierer drifta med å ta forskingsoppdrag innan blant anna miljø, petroleum, nukleær og energi-teknologi. Dei er tradisjonelt sett mest kjent for å drive forskingsreaktorane på Kjeller og i Halden. Dei siste åra har dei blant anna satsa på blant anna forsking på solcelle-teknologi.