Anders Hauge-Eltvik

anders.hauge-eltvik@lomedia.no

Regjeringa kom i revidert nasjonalbudsjett med 84,6 millionar kroner ekstra til NAV. Arbeidsminister Hanne Bjurstrøm (Ap) veit kva områder som skal prioriterast.

Auke

– Styrkinga skal mellom anna sikre framdrifta i arbeidet med modernisering av IKT-systema, raskare handsaming av feilutbetalingssaker og auka innsats mot trygdemisbruk, seier ho.

Bjurstrøm understrekar at IKT-arbeidet er viktig for NAV, og at det krev pengar. Ho lovar å følgje nøye opp dette arbeidet framover. I tillegg er ho oppteken av at NAV er i stand til å avdekke juks:

– Det er grunnleggjande at det er tillit til Arbeids- og velferdsdirektoratet knytt til stønadsforvaltninga. Difor er det viktig å identifisere og handsame fleire feilutbetalingar og samstundes intensivere innsatsen for å avdekkje trygdemisbruk, poengterar Bjurstrøm i ei pressemelding.

Tiltak

Hanne Nordhaug, nestleiar i NTL NAV, reagerer på at regjeringa reduserer talet på tiltaksplassar for arbeidsledige med 2100, og aukar talet på tiltaksplassar for menneske med nedsett funksjonsevne med 2600. Det gjev 500 opp i netto, noko ho meiner er alt for lite.

– Eg fryktar ei tiltakskrise. Sjølv med 500 nye tiltaksplassar er vi framleis under 72 000 tiltaksplassar, altså 18 000 plassar under det vi meiner er naudsynt, seier Nordhaug.

Ho poengterar også at fyrste halvår i år har vore mange menneske på tiltaksplassar, og at etaten har brukt meir pengar enn budsjettert på dette. Difor ventar ho at færre får tiltaksplassar andre halvår, og at dei 500 nye ikkje får noko særleg effekt.

For lite

Nordhaug meiner det er bra med auke løyvingar til utvikling av nytt IKT-system. Men ho tykkjer det er for lite.

– Det er veldig lite til drifta av det gamle IKT-systemet, så då får vi ikkje gjort det vedlikehaldet vi ønskjer i år, og då blir noko utsett til neste å. Det påverkar igjen driftsbudsjettet for 2012. Det kjem til å bli tøffe prioriteringar for resten av året, seier ho.

Nordhaug oppsummerer revidert budsjett slik:

– I forhold til tiltaksplassar er det ikkje bra, når det gjeld nytt IKT-system er det bra, og i forhold til driftsbudsjettet blir det tøft.