Randi Bergan

randi@lomedia.no

Jarle Kirketeig er ein modig mann. I slutten av august sto han fram på NRK Sogn og Fjordane og skulda fagforeiningsleiar Magne Ulvatn for trakassering. Organisasjonsarbeidaren har vore sjukskriven sidan juni på grunn av arbeidsmiljøet ved avdelingskontoret.

Etter at saka kom ut i NRK, har tidlegare tilsette vore i media og støtta Kirketeig. Fleire av Fellesforbundet sine klubbleiarar i fylket er sjokkerte og vil kaste styret, som vurderer å seie opp organisasjonsarbeidaren.

Magne Ulvatn var klubbleiar ved Kleven-verftet i Florø i perioden 1996-2003. Han kom inn i Fellesforbundets representantskap i 2003. Sidan 2007 har han hatt plass i forbundsstyret.

Kirketeig vart innkalla til drøftingsmøte med arbeidsutvalet i avdelinga 13. september. Han stilte med advokat betalt av Fellesforbundet. Avdelinga stilte med advokat frå Arbeiderbevegelsens Arbeidsgiverforening. Det vart inga avklåring på møtet.

Ville vera lojal

Organisasjonsarbeidaren presiserer at personstriden ikkje har noko med fagrørsla å gjera.

– Eg ville vera lojal, og heldt kjeft – heilt sidan 2007. Eg var redd det skulle skade fagrørsla. Til slutt møtte eg veggen, forklarer han til Magasinet då vi intervjua han før han hadde motteke oppseiinga.

– Eg har ei kjensle av å stå og halde oppe ein vegg som er i ferd med å knuse meg. Hadde det ikkje vore for støttemeldingar og e-post frå folk i alle bransjar...

– Kvifor gjekk du til NRK?

– Om eg hadde slutta utan å gå til media, ville ein ny person få same problem, svarer han. To tidlegare tilsette har slutta på grunn av trakassering.

– Hadde det ikkje vore betre å løyse striden internt?

– Jau, sjølvsagt. Eg har teke opp saka gong på gong, utan at det hjelpte.

Mista ansvar

Magasinet har fått sjå det Kirketeig har notert om samarbeidsklimaet på avdelingskontoret. Tilhøvet til leiaren blir stendig dårlegare frå hausten 2008, utan at han skjønar kvifor. Kort sagt handlar historia om uklåre rutinar for rapportering, ein leiar som ikkje ser medarbeidaren sin innsats og ikkje har tillit til han, tek frå han arbeidsoppgåver og fortel andre at han er ein dyr mann. Og i tillegg kjem med krasse og sårande utsegner.

Kirketeig fekk fleire gonger i 2009 varsel om at han ikkje kunne halde fram i full jobb.

– Samstundes jobba leiaren då for at han sjølv skulle få fast tilsetting. Eg sat med ei kjensle av at eg sat i vegen for Magne Ulvatn, skriv han.

Ba forbundet om hjelp

Kirketeig kopla inn arbeidsutvalet i fagforeininga, utan at det førte til noko. Han gjekk direkte til leiaren, ville ikkje gå bak ryggen på han. Etter som tida gjekk, så han at ikkje noko kom til å endre seg til det betre. Og bestemte seg for å kontakte forbundet og be om hjelp.

– Eg hadde kontakt med Geir Olsen på distriktskontoret i Bergen, som tok kontakt vidare til toppleiinga i forbundet. Etter det eg forsto, var det leiar og 1. nestleiar som behandla saka. Men eg har ikkje snakka med dei direkte, fortel organisasjonsarbeidaren.

Forbundet ville ikkje ta stilling. Men Kirketeig fekk godkjenning for å kontakte advokat.

Nye vonbrot

Då avdelinga fekk vita at han tenkte å saksøke dei, fekk dei inn ein meklar. Kirketeig seier meklaren var klar på kva problemet var, og dette vart gitt munnleg til partane og nestleiar. Han vart optimistisk og håpa at ting skulle jenke seg til. Men slik skulle det ikkje gå.

– Etter årsmøtet i mars 2010 forsto eg at styret ikkje var informert om resultatet av meklinga. Etter det mista eg håpet igjen, og det enda med at eg på hausten i fjor fekk advokathjelp frå forbundet. Det vart då laga ein 10-punkts plan som gav meg eit nytt håp om at no ville ting endre seg. Men dette hjelpte heller ikkje, fortel Kirketeig.

På eit møte i september gav nestleiar Kormeseth klårt uttrykk for at hadde dei vore imot planen frå første stund, sjølv om dei hadde underskrive avtalen.

Vil kjempe for jobben

– I utgangspunktet har eg ein fantastisk fin jobb, der eg kan få hjelpe medlemane, seier Jarle Kirketeig. Han er utdanna som industrimekanikar, har vore hovudtillitsvalt i Forsvaret og seinare kursa seg opp til jobben han har i dag.

Sjølv vil han ikkje seie opp stillinga si.

– Eg sel ikkje integriteten min uansett størrelse på sluttpakke, seier han til Magasinet.

Vil ikkje seie noko

– På kva grunnlag vurderer de å seie opp Kirketeig?

Nestleiar i styret, Bjørn Martin Kormeseth, sendte Magasinet følgjande svar i forrige veke, før oppseiinga vart kjend:

– Som arbeidsgjevar må Fellesforbundets avdeling 19 følgje spelereglane i arbeidslivet på lik line med alle andre arbeidsgjevarar. I høve som gjeld tilsette, er vi utan moglegheit til å kommentere dette offentleg. Styret jobbar aktivt med denne saka, og vi kan forsikre medlemane om at vi følgjer spelereglane i arbeidslivet i slike prosessar.

Magasinet har kontakta Magne Ulvatn fleire gonger, men han har vore taus. Etter at han har lese skuldingane mot seg, viser han til nestleiaren si utsegn – at saka ikkje kan kommenterast offentleg.