Saknar felles tillitsvald
– Vi treng ein konserntillitsvald i Fellesforbundet, meiner Thor Åge Christiansen, organisasjonsarbeidar i Avdeling 9 Østre Agder i kjølvatnet av Kirketeig-saka.
randi@lomedia.no
Dei tilsette på Lilletorget og distrikts¬kontora har tariffavtalar med Fellesforbundet. Men desse gjeld ikkje for avdelingane i distrikta, som er sjølvstendige juridiske einingar.
Og personkonflikten i Førde er ikkje einestående i forbundet. Hadde dei einskilde avdelingane etablert seg som partar, hadde dei kanskje sluppe nokre av konfliktane.
– Dei tilsette i avdelingane som er medlemar i Fellesforbundet, har ikkje nokon felles talsperson eller tillitsvald som kan hjelpe om dei skulle koma i konflikt på arbeidsplassen, seier Christiansen.
Dårleg framdrift
– Kvifor kan vi ikkje få ein «konserntillitsvald» for dei tilsette i avdelingane? Gjerne i samarbeid med dei tilsette i Fellesforbundet, seier han.
Organisasjonsarbeidaren i avdeling 9 kjem opprinneleg frå Ringnes-Orkla-systemet. Der har dei konserntillitsvalde, på same måte som mange andre konsernliknande verksemder.
Thor Åge Christiansen tok initiativ til å samle organisasjonsarbeidarane i fjor haust. Dei 33 som møtte, vart einige om å jobbe vidare med saka. Men det har gått trått.
– Eg har kjent meg kraftig motarbeida av administrasjonen på Lilletorget, seier han frustrert.
Må bli proffe
Rune Werring Olsen er hovudverneombod i Fellesforbundet. Han seier han har teke opp i arbeidsmiljøutvalet at også avdelingane må bli profesjonelle arbeidsgjevarar. Dei treng eit internkontrollsystem, slik at personal¬konfliktar vert handsama etter boka, meiner han.
På generelt grunnlag har forbundsleiinga oppfordra avdelingane til å melde seg inn i Arbeiderbevegelsens Arbeidsgiverforening. Då vil dei mellom anna få hjelp i konfliktar med eigne tilsette. Nokre har fulgt denne oppfordringa, andre ikkje.
Ulike roller
– Rolla som tillitsvald og som arbeidsgjevar er to heilt ulike ting. Eit avdelingsstyre er arbeidsgjevar for dei tilsette, utan å ha fått opplæring i den delen av i jobben. Sjølv er eg styreleiar for eit målekontor med to tilsette, utan noka opplæring. Du kan ikkje bruke ein røff klubbleiar-tone når du skal vera sjef. Gjer du det, blir det garantert problem, seier Thor Åge Christiansen i Østre Agder.