Anders Hauge-Eltvik

anders.hauge-eltvik@lomedia.no

«T2» er namnet på utvidinga av Oslo Lufthavn, som er sterkt ønskt av NTL Luftfarten og NTL OSL. 12,5 milliardar kroner skal brukast til å nesten doble terminalarealet.

Flyplassen var eigentleg dimensjonert for 17 millionar reisande i året. Med 21 millionar reisande i 2011, er behovet tydeleg for ei utviding som skal gje rom for 28 millionar reisande årleg.

Stort

NTL Luftfarten heldt tillitsvaldsamling på Gardermoen i slutten av mars, og dei tillitsvalde frå heile landet fekk sett nærare på byggjeprosjektet som er viktig for alle dei andre flyplassane rundt om i landet.Avinor sine store og lønnsame flyplassar subsidierar dei mindre og ulønnsame rundt om i distrikta. Fleire reisande og større overskot på OSL styrkar dermed dei andre.

Utbygginga skal vere ferdig i 2017, og leiar Ole Hansen i NTL Luftfarten Oslo Lufthavn seier det er krevjande å byggje så mykje på ein flyplass som er fullt trafikkert heile vegen.

– Vi tykkjer det er veldig artig og spanande å få vere med på denne utbygginga. Det er krevjande å bygge her, noko som gjer HMS og tryggleik veldig viktig. Og så er det mange av våre medlemmer som får meir å gjere under og etter bygginga, så det føl vi med på, seier Hansen.

Med nesten dobla areal, føreset Hansen at OSL oppbemannar tilstrekkeleg slik at dei har nok folk.

– Dessutan blir det viktig å vidareutdanne personellet vi har, det er mange som får meir dei skal kunne med denne utbygginga, seier han.

Utbygginga inkluderer ein ny pir som går nordover frå dagens terminal. I tillegg blir terminalen utvida tett ved jernbanestasjonen. Nye taksebaner må leggast på utsida av den nye piren, som vil føre til eit auka areal som må brøytast av plasstenesta ved OSL.

All snøen som vert måka vekk her om vinteren skal lagrast i eit deponi, der kulden skal nyttast til å kjøle ned terminalen om sommaren.

Nye hallar til brøyteutstyr

Plasstenesta har behov for meir plass, og får nye hallar til nytt brøyteutstyr. Personalbygget skal rivast, og i mellomtida skal plasstenesta halde til i ein brakkerigg som er montert.

I byggjeperioden vil ein del av gatane som er i bruk i dag forsvinne, og desse skal erstattast med eit midlertidig terminalbygg på sørsida av dagens terminal, som etter planen skal rivast etter at nybygget er ferdig. Denne terminalen skal forbindast med innanriksterminalen med ei gangbru.

Trafikkveksten i norsk luftfart er sterk, så når utbygginga er ferdig kan det godt hende ein nærmar seg passasjertaket på nybygget kort tid etter at alt står ferdig i 2017. Men det vert lagt til rette for ytterlegare utbygging ved OSL, og det vert diskutert om flyplassen treng ei tredje rullebane for å møte behova til reisande nordmenn.