Gunvor Eldegard, Stortingsrepresentant, Ap, næringskomiteen

Ein annan viktig grunn er at me ynskjer at fellesskapet skal eige energiressursar og petroleumsførekomstane, slik at inntektene frå desse ressursane kan brukast til å vidareutvikle det norske velferdssamfunnet. Dette er heilt i tråd med Arbeidarpartiets sin politikk og tradisjonar.

Staten har eigarinteresser i 80 selskap med meir enn 280 000 arbeidsplassar.

Me har mange solide statlege bedrifter – m.a. StatoilHydro, Telenor, Statkraft – som gjer det godt i tøff internasjonal konkurranse. Desse tilfører store økonomiske ressursar til fellesskapet og det norske velferdssamfunnet.

Ei undersøking som nyleg vart gjort for vekemagasinet Mandag Morgen, viste at statleg eigarskap har massiv støtte også blant norske bedriftsleiarar. Heile 72% av bedriftsleiarane er positive til statleg eigarskap i næringslivet. Faktisk var det berre 9% som meiner at staten skal redusere eigarskapet sitt. Bedriftsleiarane er tydeleg heilt på linje med politikken til Arbeidarpartiet og regjeringa på dette området. Det er sjølvsagt gledeleg. Adm. dir. Stein Lier-Hansen i Norsk Industri uttaler i ein kommentar: «Kritikerne til statlig eierskap er ikke representative for næringslivet. »

Høgreleiinga fekk nok morgonkaffen skikkeleg i vrangstrupen då dei kunne lese resultatet av undersøkinga! Partiet sin næringspolitiske talsmann Torbjørn Hansen uttalar i ein uvanleg spak kommentar: «Jeg er kanskje litt overrasket over at så mange er fornøyd med omfanget.»

For høgrepartia har hamra og jamra over statleg eigarskap. Dei vil selje ned, og dei vil selje ut og dei vil privatisere. Statleg eigarskap er noko styggedom, meiner dei!

Men undersøkinga viser altfor tydeleg at høgrepartia er totalt i utakt og på kollisjonskurs med det leiarane i næringslivet sjølv ynskjer.

LO-Aktuelt nr. 10/2009