Framleis nedover i industrien
Norsk industriproduksjon gjekk ned med 2,8 prosent frå mars til og med mai 2009 samanlikna med den førre tremånadersperioden, viser sesongjusterte tal.
Dette er mellom anna knytt til den svake utviklinga i metallindustrien. Sesongjusterte tal viser at produksjonen i metallindustrien gjekk ned med 9,4 prosent i den siste tremånadersperioden.
34% ned i metallindustrien
Sidan juli 2008 har produksjonen i denne næringa gått ned 34 prosent. Dette er på grunn av den markerte svikten i den internasjonale etterspurnaden som følgje av finanskrisa, skriv Statististisk Sentralbyrå (SSB).
Papir- og papirvareindustrien og metallvareindustrien har også hatt stor nedgang i produksjonen.
Vekst i trelastindustri
Det har likevel vore vekst i enkelte delar av norsk industri i den siste tremånadersperioden samanlikna med den førre. Det gjeld til dømes trelast- og trevareindustrien som hadde ein auke på 0,8 prosent i produksjonen etter fleire periodar med nedgang. Veksten i bygging av skip og plattformer og maskinindustrien har halde fram. Her var det ein oppgang på høvesvis 1,1 og 0,6 prosent frå mars til og med mai 2009 samanlikna med den førre tremånadersperioden.
Opp i papirindustrien
Virkedagskorrigerte tal viser at produksjonen i industrien gjekk ned med 9,8 prosent frå mai 2008 til mai 2009. Metallindustri, gummi, plast og mineralsk industri og annan verkstadindustri hadde eit markert fall i produksjonen, medan maskinindustrien og industri knytt til bygging av skip og plattformer hadde ein vekst på høvesvis 3,1 og 5,9 prosent.
Metallindustrien ned
Sesongjusterte tal viser at det var ein nedgang i norsk industriproduksjon på 0,7 prosent frå april til mai 2009. Metallindustrien, saman med møbelindustri og annan industri, hadde størst nedgang i produksjonen, medan trelast- og trevareindustrien og papir- og papirvareindustrien hadde ein vekst.
Norsk industri samanlikna med eurosona
Norsk industriproduksjon gjekk ned med 10,6 prosent frå april 2008 til april 2009, viser virkedagskorrigerte tal. Statistikk frå Eurostat legg til grunn at industriproduksjonen i land i eurosona gjekk ned med 21,6 prosent i same tidsrom.