Tormod Ytrehus

tormod@lomedia.no

Den danske regjeringa og partane i arbeidslivet har blitt einige om ei lønnsrefusjonsordning for bedrifter som elles må gi tilsette sparken på grunn av koronaviruset.

– Avtala er eit veldig positivt bidrag til å skape tryggleik for lønnsmottakarar i denne vanskelege situasjonen, sa leiar Lisette Risgaard i Fagbevægelsens Hovedorganisation på ein pressekonferanse søndag.

Her er den danske avtala:

• Staten betaler 75 prosent av lønna, inntil 23.000 danske kroner

• Arbeidsgivarane betaler dei resterande 25 prosentane

• Arbeidstakarane tar ut fem dagar ferie eller avspasering

Avtala er berekna å koste staten 2,6 milliardar danske kroner.

– Staten bidrar, lønnsmottakarane bidrar og verksemdene bidrar. Den danske modellen er sterk, og styrka ser vi no, seier statsminister Mette Frederiksen (S).

p

Bedriftene som nyttar ordninga må stå i fare for å seie opp minst 30 prosent eller meir enn 50 tilsette.

Lønnsrefusjonen kan dei få i tre månader framover, mot at bedriftene forpliktar seg til å ikkje gi tilsette sparken på grunn av økonomiske problem.

– Vi skal gjere det vi kan for at det ikkje kjem ytterlegare store oppseiingsrunder, seier administrerande direktør Jacob Holbraad i Dansk Arbejdsgiverforening.

Her heime er regjeringa og stortingspartia søndag kveld i forhandlingar om den norske krisepakka. Regjeringa har fått kritikk fordi dei foreslår å korte ned perioden permitterte får full lønn før dei må gå over på dagpengar frå Nav.