Tormod Ytrehus

tormod@lomedia.no

For kvar dollar minstelønna auka med, minska delen som tok livet sitt med mellom 3,5 og 6 prosent. Det er funna i ein ny amerikansk studie.

Resultatet gjeld dei utan høgare utdanning mellom 18 og 64 år, og effekten er størst i periodar med høg arbeidsløyse. For dei med høgare utdanning, hadde ikkje endring i minstelønn nokon effekt på talet sjølvmord.

p

Forskarane ved Epidemiology & Community Health har undersøkt samanhengen mellom sjølvmord, minstelønn og utdanning, med utgangspunkt i tal frå nesten alle delstatar i USA i perioden mellom 1990 og 2015.

Det er kjent at økonomiske problem og arbeidsløyse har innverknad på talet sjølvmord, skriv forskarane. Men det er mindre kjent korleis ein auke i minstelønn kan bidra til å få talet ned.

Etter finanskrisa i 2009, kunne nesten 14.000 sjølvmord vore forhindra med ein minstelønnsauke på 1 dollar, ifølge forskarane. Talet er nesten 26.000 med ein auke på 2 dollar.

I heile perioden, anslår forskarane at nesten 28.000 sjølvmord kunne vore forhindra med ein lønnsauke på 1 dollar, og over 57.000 med ein auke på 2 dollar.

p

USA har ei føderal minstelønn som gjeld alle delstatar, men statane kan innføre ei høgare minstelønn. I dag har eit tredvetals delstatar gjort dette, mens eit tjuetals følger den føderale minstelønna på 7,25 dollar.

Fleire fagforeiningar og politikarar kjempar for å auke den føderale minstelønna til 15 dollar i timen.