Tormod Ytrehus

tormod@lomedia.no

– Denne saka er historisk, fordi det er den første med dette temaet som blir behandla i rettssystemet og som slepp inn i Høgsterett, seier LO-advokat Tina Storsletten Nordstrøm til Magasinet for fagorganiserte.

Hendene under genseren

Ein 22-år gammal kvinneleg industriarbeidar og Fellesforbundet-medlem, saksøkte i 2018 arbeidsgivaren og to mannlege kundar. Kravet er erstatning for seksuell trakassering og brot på likestillings- og diskrimineringslova.

I Senja tingretten i april i fjor, vart ein av kundane og arbeidsgivar dømt til å betale erstatning til kvinna. Den eldre mannen hadde blant anna lagt hendene under genseren til kvinna. Begge partar anka dommen. Arbeidsgivaren og den eine kunden vart dømt i Hålogaland lagmannsretten i desember. Den andre kunden vart derimot frifunne også i der.

Kvinna og LO sine advokatar meiner begge kundane har gjort seg skuldig i seksuell trakassering. Både dei og motparten anka saka til Høgsterett i januar. No er saka slept inn i Høgsterett av domstolen sitt ankeutval. LO-advokatane melde først om dette i Facebook-gruppa si.

Diskrimineringsnemnda

Dermed må domstolen ta stilling til kva som er omfatta av lovforbodet mot seksuell trakassering, og arbeidsgivar sin lovfesta plikt til å stoppe trakasseringa.

LO-advokat Nordstrøm seier dommen kjem til å bli viktig for Diskrimineringsnemnda, som frå 1. januar i år kan idømme oppreising i saker om seksuell trakassering.

– Det er viktig at vi får ein dom i rettssystemet som seier korleis desse sakene skal behandlast, seier ho.

Magasinet har vore i kontakt med advokat Hedvig Cecilie Svardal som har ført saka for dei to kundane og bedrifta. Ho ønsker ikkje å kommentere saka.