Tormod Ytrehus

tormod@lomedia.no

Det er ein kjennelse i den danske voldsgiftretten som banar veg for kravet, skriv Fagbladet3F . Der vart tre underbetalte polske vikarar tilkjent omtrent 555.000 norske kroner i erstatning frå bemanningsbyrået Adecco.

p

Systematiske brot

Fagforbundet 3F skulda Adecco for systematiske brot på reglane for arbeids- og kviletid samt overtidsbetaling.

Ein av vikarane jobba 34 dagar i strekk og jobba arbeidsveker på 91 timer tre veker på rad, viste timelister. Ein annan vart så utkøyrd at han mista eit stort betongelement frå krana si.

Vikarane jobba i perioden 2013 til 2016 på den gigantiske metroutbygginga i København, der det har vore ei rekke erstatningssaker mellom utanlandske underleverandørar og underbetalte tilsette dei siste åra.

– Eg er nøgd med at det har falt ein klar kjennelse på at det er dyrt å misbruke tariffavtala, seier fagleg sekretær Silas Grage i 3Fs lokalavdeling til Fagbladet3F.

Millionkrav

3Fs lokalavdeling i København varslar no eit erstatningskrav på heile 64 millionar norske kroner. Dette er på vegner av alle 1.350 Adecco-vikarar som har arbeidd på byggeprosjektet i same periode som dei tre polske kranførarane.

3F opplyser at kravet kan bli enda større dersom dei klarer å bevise fleire brot på tariffavtala. Dette kan dermed bli Danmarks største rettssak om underbetaling. Saka skal behandlast i retten i november og desember.

– Kjennelsen omfattar tre kranførarar med eit arbeidsmønster som på ingen måte er representativt for dei øvrige vikarane frå Adecco som har jobba på metroutbygginga, uttaler Mickey Maymann, direktør i Adecco Danmark, som også påpeikar at det opprinnelege kravet var nærmare 1,7 millionar kroner.

Ikkje overraska

Personar som har jobba mykje med problematikken rundt innleige av bygningsarbeidarar i Norge, er ikkje overraska over det som kjem fram i København. Metroutbygginga er kjend over landegrensene for å ha låge lønningar, lange arbeidsdagar, mange arbeidsulukkar og nesten berre utanlandske arbeidstakarar.

– Vi er rimeleg trygge på at liknande ting skjer også i Norge, men vi veit ikkje kor stort omfanget er. Vi går ut frå at den største delen skjer i den uorganiserte delen av arbeidslivet. Inntrykket vårt er at dei store og organiserte bedriftene har ting mest på stell, men vi har registrert ulike kreative ordningar for å unngå likebehandling, seier Steinar Krogstad, nestleiar i Fellesforbundet, til FriFagbevegelse.