Éin av tre vil bytte ut EØS-avtala med ei ny handelsavtale
Delen som svarer at dei vil halde på EØS-avtalen i staden for ei ny handelsavtale er berre fire prosentpoeng større.
Ole Palmstrøm
tormod@lomedia.no
Det viser ei meiningsmåling frå Sentio på oppdrag frå Nei til EU. 1000 personar er spurt, og målinga er gjennomført i månadsskiftet mai-juni.
Spørsmålet er «stør du ei handelsavtale med EU i staden for EØS-avtala?» 33 prosent svarer ja, 37 prosent svarer nei og 31 prosent veit ikkje.
p
Høgre og Arbeidarpartiets veljarar stør i størst grad EØS-avtala (48 og 47 prosent) framfor ei anna handelsavtale, medan flest Senterpartiet- og Raudt-veljarar stør ei anna handelsavtale (49 og 40 prosent) framfor EØS-avtala.
– Svara slår sprekkar i mantraet om at vi må ha EØS for å handle med EU. Når folk får alternativ ønsker like mange ei likeverdig handelsavtale som EØS-avtala, seier Kathrine Kleveland, leiar i Nei til EU, i ei pressemelding.
På spørsmålet om kva ein ville stemt dersom det var folkeavstemming om EØS-avtalen i morgon, er svaret nemleg annleis, ifølge Klassekampen og Nationen si Sentio-måling for juni.
Der svarer 61 prosent at dei ville stemt ja, 25 prosent ville stemt nei og 11 prosent veit ikkje. Det er rekordstor støtte til EØS-avtala på dette spørsmålet.
Eit klart fleirtal meiner også EU har for mykje makt i Norge, ifølge Nei til EUs måling. 52 prosent er einige, 36 prosent er ueinige og 12 prosent veit ikkje.
