Øystein Windstad

oystein.windstad@lomedia.no

– Dei vil få 15.000 under gjeldande tariff, vi håpar å finne ei løysing så ikkje juletrafikken blir ramma, seier Tor Erik Granum, forbundssekretær i NTL.

I dag, onsdag, starta møta hos Riksmeklingsmannen. Om ikkje partane blir einige, blir det streik ved flyplassen i Bodø frå fredag kl 13:00.

Streiken vil ramme alle SAS og Norwegian-avgangar til og frå Bodø og truleg andre delar av Nord-Norge. Stridens kjerne er kva løn brann- og redningsmannskap ved flyplassen i Bodø skal få, etter at tenestene blei satt ut til anbod og tatt over av Falck.

Før var det Forsvaret og Avinor som dreiv brann- og redningstenestene ved flyplassen:

– Vi går inn for å finne ei løysing. Ingen kjem ut herifrå utan å ha gjeve noko. Vi er veldig opptekne av å finne ei løysing, slik at vi slipp ei konflikt midt oppe i julerushet på flyplassen. Vi ønskar definitivt ikkje å ramme tredjeperson. Det får vere arbeidsgjevar sitt ansvar om det skjer, seier Tor Erik Granum i NTL. Han og LO Stat forhandlar med Falck og Spekter.

• Privatiserte brannmenn ved Bodø lufthavn til mekling

Privatisering pressar løner og arbeidsvilkår

Regjeringa har vedteke at brann- og redningstenestene i Bodø skal konkurranseutsettast. Dei som skal drive tenestene slepp å kjøpe inn noko utstyr:

– Avinor stiller med alle brannbilar, utstyr og brannstasjonen. Når vi har gått igjennom anbodspapira viser det seg at det Falck kan konkurrere på er løns- og arbeidsvilkår, seier Granum i NTL. Han legg til:

– 15.000 kroner er eit stort beløp og vil ha ei betydning for ein familie og ei hushaldning.

• Brannmenn tilbudt løn langt under tariff ved Bodø lufthavn

HÅPER PÅ LØYSING: Anne-Karin Bratten er administrerande direktør i Spekter og leiar forhandlingane på vegne av Falck. Ho seier at dei skal gjere det dei kan for å unngå brot i forhandlingane og streik: - Brannmennene vil få stort sett det same dei fekk då dei var tilsette i Forsvaret. Vi skal gjere det vi kan for at det ikkje blir streik før jul.

Ole Palmstrøm

– Får stort sett det same som i Forsvaret

Anne-Kari Bratten er administrerande direktør i arbeidsgjevarforeninga Spekter. Ho leiar forhandlingane på vegne av Falck:

– Eg håpar først og fremst at vi finn ei løysing som gjer at flya går i Bodø på fredag. Vi kjem til å jobbe beinhardt for det. Leiinga i Spekter skal jobbe alt det vi kan for å sikre at vi får ei løysing med LO slik at juletrafikken ikkje blir ramma.

– Kva seier du til utregningane frå NTL at brannmennene vil få 15.000 mindre i månaden, enn om dei jobba i Avinor?

– No står det ikkje noko i avtalen vi har med LO at vi skal samanlikne lønsnivået med andre bedrifter. Dette er arbeidstakarar som har sagt ja til arbeidsavtalar. Dei har fått stort sett den løna dei hadde frå før i Forsvaret. Dei har eit krav om å gå opp i snitt 90.000 kr i løn. Så er det legitimt at NTL ønskar ein tariffavtale med eit høgare lønsnivå og det har vi så langt sagt nei til. Det er grunnen til at det er brot og mekling.

– Korleis ser du på å starte meklinga?

– Eg har gode erfaringer med å få til lyøsning i mekling, og no er det Riksmeklingsmannen som leiar dette. Eg har gode erfaringar med at LO er ein konstruktiv motpart. Det er eg heilt sikker på at dei kjem til å vere her. Vi er veldig innstilt på å finne ei løysing, seier Bratten i Spekter. Partane har frist til å finne ei løysing innan midnatt torsdag.