Anne-Grete Lossius

anne.grete@lomedia.no

Jarle Berge, som leder Norsk Tenestemannslags landsforeining i NAV, er glad for at LO er ein ivrig tilhengjar av IA-avtalen, og stiller som garantist for å forlengja denne.

Ikkje hindret utstøyting

– IA avtalen er ein intensjonsavtale. Kanskje det er ein idé å gjera avtalen meir forpliktande for partane, seier Berge.

Dette kan gjerast ved at IA-bedrifter forpliktar seg til å ha tilrettelagde arbeidsplassar, både varige og midlertidige, og at IA bedrifter forpliktar seg til å tilsetje arbeidstakarar med redusert funksjonshemming.

– På den måten kan ein hindra skadeleg og unødvendig utstøyting og få til meir inkludering i arbeidslivet. Til no, etter snart sju år med IA avtale, har me i altfor liten grad klart å hindra utstøyting, inkludera menneske med funksjonshemming og eldre arbeidstakarar i arbeidslivet.

Altfor mange står utanfor

Det er ei kjensgjerning at altfor mange i arbeidsdyktig alder er utanfor arbeidslivet og går på ulike trygdeordningar.

– Mange av desse kan sjølvsagt ikkje vera i jobb pga. sjukdom, skade eller lyte. Desse fortener ei trygd og ei trygd det går an å leva av! Det fastslår Berge.

Han legger til at det likevel er eit trist faktum at mange som vil og kan vera i arbeidslivet er tvinga over på ulike trygdeordningar.

– Det er resultatet av det brutale arbeidslivet, som har skyhøge krav og forventningar til den enkelte arbeidstakar.

– Dei som ikkje klarer å leva opp til desse krava vert ofte pressa ut av arbeidslivet, dessverre. Dette er skadeleg både for den enkelte, bedriftene og for samfunnet, seier Berge.

Styrk arbeidslivssentra

NAV Arbeidslivssentra, med sine om lag 500 IA-rådgjevarar, er det viktigaste verktøyet for partane i IA-arbeidet.

Arbeidslivet, både tillitsvalde og arbeidsgjevarar, melder tilbake om at arbeidslivssentra gjer ein god og nyttig jobb.

– Derfor er det viktig at arbeidslivssentra vert styrka og at IA-rådgjevarane får konsentrera seg om å følgja opp IA avtalen og IA bedrifter, framhelder Berge.

Han seier at NAV er i krise med ei mengde ubehandla enkeltsaker.

– I ein slik situasjon er det freistande for NAV å bruka IA-rådgjevarar til enkeltsakbehandling. Skjer det vil me undergrave IA-avtalen og IA-arbeidet i bedriftene. Det må ikkje skje!