Slik vil regjeringa sikre at staten tilset fleire med hol i CV-en
Regjeringa kjem med fleire forslag for å sikre at staten inkluderer fleire i arbeidslivet.
Kai Hovden
tormod@lomedia.no
Fredag sendte Kommunal- og moderniseringsdepartementet endringar i forskriftene til statstilsettelova ut på høyring.
Regjeringa foreslår at jobbsøkarar med hol i CV-en skal ha same vilkår som dei med funksjonsnedsetting har i dag. Det medfører:
• Minst éin kvalifisert jobbsøkar med hol i CV-en skal kallast inn på intervju.
• Søkarar skal tilsettast om han eller ho er tilnærma like godt kvalifisert som den best kvalifiserte søkaren.
• Personar med hol i CV-en kan søke på stillingar i eit praktikantprogram (lansert i juni).
• Arbeidsgivarar kan tilsette ein praktikant fast utan offentleg utlysing etter at praktikantprogrammet er fullført.
p
Personar med hol i CV-en har blitt definert som «ein nytilsett som har hol i CV-en på minst to år der personan ikkje har vore i arbeid, utdanning eller under opplæring».
Staten skal gå foran ...
Regjeringa lanserte den såkalla inkluderingsdugnaden for folk med nedsette funksjonsevne og hol i CV-en i plattformen sin etter valet i 2017.
– Staten skal gå foran i inkluderingsdugnaden, seier kommunal- og moderniseringsminister Monica Mæland (H) i ei pressemelding.
Målet er at minst fem prosent av nytilsettingar i staten skal vere personar med funksjonsnedsetting eller hol i CV-en.
... men ligg dårleg an
Staten tilset 20.000 personar årleg, ifølge regjeringa. Eit mål om fem prosent nytilsette med funksjonsnedsetting eller hol i CV-en vil dermed utgjere 1000 nytilsette årleg.
Ei undersøking av nytilsettingar andre halvår i fjor, viser at staten ligg dårleg an. Berre Arbeids- og sosialdepartementet er i nærleiken av å oppfylle målet, der delen nytilsettingar av folk med funksjonsnedsetting eller hol i CV-en er på 4,5 prosent.
– Vi ber no alle departementa om å intensivere inkluderingsdugnaden i sektorane sine, seier Mæland.
Dette er en sak fra
Vi skriver om de ansatte i staten og virksomheter med statlig tilknytning.