Øystein Windstad

oystein.windstad@fagbladet.no

På landsmøtet til Fagforbundet har setninga «gratis arbeidstøy» blitt sagt nesten like ofte som «kameratar» frå talarstolen. Fleire tillitsvalde har håpa at regjeringa skal setje av pengar i haust.

Skal setje seg ned med Fagforbundet

Stortingsrepresentant Elise Waagen er arbeidspolitisk talsperson for Ap. Ho seier at regjeringa kjem til å levere på valkampløftet:

– Alle tilsette skal få dekka kostnadene til arbeidstøy. Men arbeidsgivar har i dag eit ansvar for å sørgje for at ein har det utstyret ein treng. Så om dette blir ein post i statsbudsjettet, eller om det potensielt handlar om endringar, oppstramming av regelverk og etterleving av det – det må vi jobbe saman med blant andre Fagforbundet om, seier Waagen, som fortel at dei no jobbar med å finne ut korleis dette skal gjerast i praksis.

Innan fire år

Waagen seier at dei er i gang med arbeidet for gratis klede og sko på jobben.

– Når blir det gratis arbeidsklede?

– Eg skulle gjerne sett at dette skjedde i går, for historiene om at tilsette i barnehagar og i heimesjukepleia anten dekker tøy sjølve eller går med heilt uegna klede, er unødvendige og uhald­bare, seier Waagen, som peikar på at i industri og mannsdominerte yrke får dei tilsette gratis arbeidsklede. 

Ho seier vidare at løftet er noko dei har lova for denne stortingsperioden – altså dei neste fire åra.

– Jobbar i bomullspysj i minus 20

Waagen seier mange kontaktar ho og Ap om dårlege klede på jobb:

– Berre i førre veke fekk eg forklart korleis tilsette i heimesjukepleia går rundt i det dei sjølve omtala som ein bomullspysj i 20 minusgrader. Behovet er der, og vi har lova at dette skal kome på plass – og det skal vi følgje opp, slår stortingspolitikaren fast.

– Kommunane vil kanskje seie at dei ikkje har så mykje pengar å ta av til gratis arbeidstøy. Kva seier du til det?

– Dette er nokre av grunnane til at vi har sett oss ned og fundert. Vi er opptekne av å ha ein kommuneøkonomi som leverer gode tenester der folk bur, og som kan ta vare på dei tilsette som jobbar i kommunane. Løysinga, regelverket og pengane må henge saman. Det skal vi no sjå på, seier Waagen.