Dei var lei av politikarprat på radio. Så dei laga like godt sin eigen podkast

Tormod Ytrehus

tormod@lomedia.no

BERGEN: Dei sit rundt eit bord i Fellesforbundet sitt hovudkvarter i det gamle blikkvalseverket i Laksevåg. Richard Storevik, Christoffer Heggholmen og Alexander Torsvik speler inn sjuande episode av podkasten sin «Proletarprat» når Magasinet for fagorganiserte er på besøk.

Kva er ein proletar? Det skal vi komme tilbake til, men først: Korleis kom ein inntil nyleg verftsarbeidar, ein bilmekanikar og ein stillasmontør på at dei skulle lage podkast?

– Eg tenkte at eg liker å høyre meg sjølv snakke. Kvifor skal ikkje eg starta podkast? seier bergensar Storevik og ler.

Saka held fram under bildet.

RADIOPRODUSENT: Stillasmontør Alexander Torsvik (til venstre) har blitt radioprodusent. Han har alltid hatt interesse for datamaskiner og lyd, men læringskurva som radioprodusent har vore bratt. Richard Storevik til høgre.

Tormod Ytrehus

Han ringde kompis og bilmekanikar Heggholmen, og forventa at han skulle skyte ned ideen. Etter ein halvtime var mikrofonane bestilt. Dei fekk også med seg kompis og stillasmontør Torsvik som radioprodusent.

Diskusjonen på golvet

I podkasten snakkar dei om politikk, arbeidsliv og kvardagen sin.

– Vi er einige om at vi skal få politikken og arbeidslivet ned på eit nivå folk kan identifisere seg med. Det andre er å vere eit talerøyr, at vi kan plukke opp diskusjonen på golvet og bruke kanalen til å nå ut til politikarar, fagrørsletoppar og andre, seier Storevik.

– Det skal ikkje bli for seriøst, vi er litt fjasete og håpar folk synest det er OK å høyre på. Det skal vere litt underhaldning, legg Heggholmen til.

Lei av politikarprat

Dei er opptatt av å bruke ord folk forstår, ikkje servere høgtsvevande vissvass. Alle har dei høyrd podkastar som «Politisk kvarter» og «Dagsnytt 18». Og irritert vettet av seg.

– Spørsmål og svar er førehandsprogrammerte. Du får ingenting ut av det. Kvifor er det ingen som snakkar om kva politikken betyr for folk? spør Heggholmen.

– Kommentarfeltet på Facebook inspirerer meg meir enn to partitoppar i eit radiostudio. Vi veit kva som treffer, for vi høyrer den ærlege praten på arbeidsplassane, seier Storevik.

Kva er ein proletar?

Magasinet stussa litt på podkast-namnet då vi først oppdaga det. Kva er ein proletar? Dei tre er smerteleg klar over at ordet ikkje er noko alle har eit forhold til.

Eigentleg skulle podkasten heite «Gutta på golvet». Same dag som første episode skulle spelast inn, fann Storevik ut at ein annan podkast hadde tatt namnet. Då foreslo ein kollega at dei skulle heite «Proletariatet», eit anna ord for arbeidarklasse.

– Så googlar Richard, ringer meg og seier at han har lært seg eit nytt ord. Hell i uhell, seier Heggholmen og ler.

• Høyr også på: Podkasten Rørsla – historier frå grasrota

Engasjere og underhalde

Høyrer proletarar på podkast? Absolutt, svarer dei.

Podkast kan du høyre på anten du er ein bilmekanikar som skrur bil, hotelltilsett som vaskar hotellrom eller er ute og luftar bikkja på kvelden.

– Podkast er Netflix for radio, eit medium der du kan høyre på det du har lyst til når det passar deg, seier Heggholmen.

Målet er å underhalde, men også å engasjere.

– Vi har masse rettar som er bygd opp gjennom årevis med arbeidarkamp. Eg håpar fleire vaknar opp og ser verdien av arbeidarkamp og arbeidarrørsla. Det hadde vore kult å få påverka særleg min generasjon, seier han.