Tormod Ytrehus

tormod@lomedia.no

– Dei vil tydelegvis ha fleire bønder i byen. Så då drar eg, ler Endre Lie.

Etter fire år som leiar i Fellesforbundet avdeling 28 Steinkjer og Stjørdal Fagforening, skiftar den tidlegare avløysaren beite. Han starta i jobben som fagleg sekretær på forbundskontoret i Oslo 1. mars, med ansvar for jordbruk og gartneri, naturbruk, avisbod og mobilkran. Ønsket om nye utfordringar er grunnen, fortel han.

– Ambisjonen er å få auka organisasjonsgraden og finne ut kvifor det er så vanskeleg i mange delar av landet, særleg innanfor jordbruk og gartneri, seier Lie.

Det er flest medlemmer og tariffavtaler innanfor grøn sektor i nettopp gamle Nord-Trøndelag og avdelinga han inntil nyleg leia. Før han vart fagforeiningsleiar, var agronomen klubbleiar i avløysarlaget Innherred Landbrukstjenester SA.

– Eg har vore tilsett i næringa i tjue år og veit kor skoen trykker. Der kan det finnast overføringsverdi også til andre område og næringar. Eg er veldig opptatt av låglønnsprofilen, spesielt innanfor gartneri som held heile overeinskomsten på eit lågt lønnsnivå. Så der er det ein jobb å gjere, slår 49-åringen fast.

Aktuelt: Yara-sjefen innstilt som ny president i NHO

Arbeidsstaden blir no Lilletorget i Oslo, men dei to første åra har han fått lov til å pendle til hovudstaden frå heimen i Steinkjer. Aller først blir det derimot heimekontor på grunn av koronaen, og han håpar han snart får ha dei gode samtalene med nye kollegaer.

Han meiner fagforeininga i Trøndelag er i gode hender, med dyktige tilsette og Simon Myhr Gulstad (34) som er innstilt til å bli vald som ny avdelingsleiar på årsmøtet 23. mars. Gulstad kjem frå byggfaga og er klubbleiar hos entreprenøren FuglesangDahl AS.

Når Lie er tilsett i forbundet må han også seie frå seg plassen i forbundsstyret der han har sete den siste halvanna perioden. Inn går vara Stian Sagvold (37) som er leiar i Fellesforbundet avdeling 108 Innherred Fagforeining og nestleiar i Verkstedklubben Kværner Verdal.

Samleside: Nytt om navn