Tekst og foto: Tormod Ytrehus

tormod@lomedia.no

Jørn Eggum, leiar av Fellesforbundet, var årets hovudtalar under folkemøtet på Torget i Trondheim.

2.500 folk møtte opp på årets 1. mai-markering, arbeidarane sin internasjonale kampdag, ifølge arrangør LO i Trondheim og omegn. Det var den første i fysisk form etter tre år med korona, med litt svakara oppmøte enn dei 3.300 som deltok i 2019.

Eggum starta med å snakke om krigen i Ukraina, som Putin-regimet starta for 66 dagar sidan.

– Krig er forakt for alt arbeidarrørsla står for, slo Eggum fast.

Han viste til at Ukraina blir bomba til ruinar, at hjelpebehovet er enormt og at Norge mottar tusenvis av flyktningar.

– Mennesker vi skal ta imot med varme og solidaritet, sa han.

Han oppfordra til å «gi så det svir» til årets innsamlingsaksjon til Norsk Folkehjelp, den internasjonale hjelpeorganisasjonen til fagrørsla, som blant anna driv med minerydding og integreringstiltak for flyktningar i Norge.

UKRAINA: Fellesforbundet-leiar Jørn Eggum oppfordra til å vise solidaritet med ukrainarane, og å gi pengar til innsamlingsaksjonen for Norsk Folkehjelp.

Tormod Ytrehus

Kamp mot høgreekstremisme

Eggum snakka så om arbeidsinnvandrarar og flyktningar som kjem til Norge. Mange arbeidsfolk opplever dette som ein trugsel mot eigen jobb og lønn, og framtida til barna i eit usikkert arbeidsliv, sa han.

– Mange av våre kameratar søker derfor etter enkle politiske løysingar, og vel høgreparti med framandfiendtlege haldningar og løysingar som står fagrørsla fjernt.

– I denne situasjonen må fagrørsla prioritere sitt sterkaste og viktigaste våpen: organisering. Makta vår ligg i talet vårt og samhaldet vårt på tvers av landegrenser og fødestad. Vi står for likeverd, fred, arbeid, samhald, demokrati og openheit.

– Og derfor skal vi kjempe mot høgreekstremismen og dei totalitære strøymingane, både i Norge og resten av verda, kvar einaste dag, sa han til applaus frå publikum.

Eggum understreka:

– Vi aksepterer ikkje at russarar i Norge utsettast for hat, trakassering og utestenging på bakgrunn av landet dei kjem frå.

– Vi har ei forplikting til å kjempe mot rasisme og diskriminering uansett kven som står for den og kven som blir ramma.

FOLKEMØTE: Hotell- og restaurant-arbeidarane i Fellesforbundet var blant dei 2.500 som møtte opp på 1. mai-markeringa i Trondheim.

Tormod Ytrehus

Frontfagsmodellen

Eggum snakka også om årets lønnsoppgjer, der ein prioritet for Fellesforbundet er å løfte dei lågtlønte. Mange av dei som tener minst i Norge er kvinner, sa han.

– I privat sektor er kampen for likelønn ein kamp mot låglønn.

– Men i offentleg sektor har vi andre problem. Dette er eit politisk ansvar for regjeringa. Likestillingsministeren må bruke heile verktøykassa og vise at staten sjølv tør å gå først i likelønnsarbeidet, oppfordra han.

Eggum understreka kor viktig frontfagsmodellen er, der forhandlingane mellom Fellesforbundet og Norsk Industri legg føringar for andre lønnsoppgjer i Norge. Han sa at modellen bidrar til å halde prisveksten nede og lønningane oppe. Frontfagsmodellen har skapt høg produktivitet, god konkurranseevne og eit godt lønnsnivå i industrien, sa han.

– Dette lønnsnivået kjem også tilsette i offentleg sektor til gode.

Han åtvara mot «ein lønnskamp der alle slåst mot alle».

– No må vi sikre ein god og berekraftig lønnsutvikling i alle bransjar, både i privat og offentleg sektor.

DEMONSTRASJONSTOG: Fellesforbundet-avdelingane stilte i 1. mai-toget med faner og parolar. Her er medlemmar frå blant anna bygg, transport og industri i Trondheim.

Tormod Ytrehus

Ny regjering

Eggum sa at 1. mai er ein dag for å minnast tidlegare sigre for arbeidarrørsla, men også mane til kamp for arbeidarrettar.

– For det er mykje å rydde opp i etter åtte år med Erna Solberg. Endeleg har vi fått ei Arbeidarparti-leia regjering som tar tak i utfordringane i arbeidslivet.

– Endeleg har vi fått ei regjering som jobbar med oss – ikkje mot oss, sa Eggum som også sit i sentralstyret til Ap.

Han lista opp gjennomslag: innstrammingar i innleige frå bemanningsbyrå, nasjonale seriøsitetskrav for offentlege innkjøp, innstrammingar i mellombelse tilsettingar og styrking av retten til heiltid.

– Alle desse tinga har vore viktige for vanlege arbeidsfolk, men vi såg at høgreregjeringa ikkje ville lytte til oss. No har vi ei regjering som lyttar. Det betyr noko kven som styrer landet.

– Det er berre eit drygt år igjen til kommunevalet. Da skal vi farge Kommune-Norge raudgrønt. Den jobben må vi gjere saman!

TALAR: Fellesforbundet-leiar Eggum var hovudtalar på markeringa av arbeidarane sin dag i Trondheim.

Tormod Ytrehus