Tormod Ytrehus

tormod@lomedia.no

I mars sende Kaefer Energy ut permitteringsvarsel til nesten alle 1050 tilsette. Dei vart permittert etter kvart som aktivitetane stoppa i samband med koronatiltak. Samtidig avvikla bedrifta all innleige.

På det meste var over 800 av dei tilsette permittert i bedrifta som driv med isolasjon, stillas og overflatebehandling (ISO) på oljeinstallasjonar.

I april leigde Kaefer likevel inn isolatørar, samtidig som dei hadde permitterte tilsette i Sverige og Finland.

• Les også: No er korona-lønna frå Nav klar. Sånn er ordninga

Forkasteleg

– Eg synest det er heilt forkasteleg. Bedrifta burde først og fremst ta vare på sine eigne tilsette, seier klubbleiar Jens Hermansson til Magasinet for fagorganiserte.

No står det strid om ein protokoll frå 10. mars mellom klubben og bedrifta. Klubben meiner den slår fast at Kaefer ikkje kunne leige inn utan avtale så lenge fast tilsette var permittert.

– Vi godtar innleige for personar som faktisk ikkje kan gå i jobb, det har vi sagt til bedrifta, legg Hermansson til.

Innleige-krangel

18. juni skal partane møtest saman med Fellesforbundet og Norsk Industri, der dei skal drøfte tolkinga og bedrifta si oppseiing av protokollen frå 1. juni.

Innleige har vore eit stridstema i Kaefer over fleire år. I 2017 sa klubben opp ei avtale om innleige. Etter fleire forsøk har dei ikkje blitt einige med bedrifta om ei avtale.

Signal frå kundar

HR-direktør Thorbjørn Jensen skriv i ein epost til Magasinet, at intensjonen til bedrifta har vore å prioritere eigne tilsette først.

– Vi oppfatta ulike signal frå våre kundar på dei ulike lokasjonane om vi kunne nytte skandinavisk personell eller ikkje. Spesielt berørte dette våre tilsette med bustad i Sverige og Finland, skriv han.

– Våre kundar hadde, og har framleis, ulik praksis og ulike tilnærmingar til covid-19-utfordringane. Med bakgrunn i den uvissa det medførte, kunne vi ikkje trekke permitteringane for personell frå desse to landa.

Sa opp avtale

Jensen skriv også at dei innleigde er frå to søsterselskap som er underlagt same leiing som Kaefer Energy.

– Då vi ikkje kunne forholde oss til korleis klubben meinte protokollen skulle tolkast, og samtidig innfri våre forpliktingar overfor kundane, såg me oss nøydd til å seie opp protokollen.

I dag er 200 permitterte i bedrifta.