Dominos Pizza i Trondheim får tariffavtale:
Dominos Pizza-arbeidarar trua med streik. No har dei vunne fram og fått tariffavtale
Dei trua med streik dersom dei ikkje fekk gjennomslag for ordna lønns- og arbeidsvilkår. No har Dominos-arbeidarane i Trondheim vunne fram med kravet om tariffavtale.
JOBB
Magasinet for fagorganiserte skreiv i januar om dei 18 tilsette ved den internasjonale pizzarestaurant-giganten Dominos Pizza sine avdelingar på Lerkendal og Moholt i Trondheim, som har meldt seg inn i Fellesforbundet og kravde tariffavtale.
Arbeidsgivaren hadde ikkje imøtekomme kravet, og dermed skulle saka gå til mekling. Medlemmene varsla streik dersom franchisetakar Rype AS ikkje signerte på tariffavtala. Då melde bedrifta seg inn i arbeidsgivarorganisasjonen Virke.
p
Tariffavtale i boks
No er den første tariffavtala signert for avdelinga på Lerkendal, fekk fagforeininga stadfesta tysdag. Ei tariffavtale for avdelinga på Moholt blir truleg signert i løpet av ei vekes tid.
– Det smakte godt. All ære til dei tilsette som i juni tok ei tøff avgjerd. Det einaste som er synd, er at det tok så lang tid. Men no er tariffavtala i boks, og jobben begynner, med å følge opp at lønns- og arbeidsvilkår blir som dei skal vere, seier leiar Børge Ånesen i Fellesforbundet sin avdeling 250 i Trøndelag.
Minstelønna i bransjen er lovfesta, men ei tariffavtale gir ei rekke andre rettar. Dei tilsette har no krav på blant anna lønnstillegg for ansiennitet og arbeid på ubekvemme tidspunkt. Dei har også krav på vaktlister over minst fire veker, avtalt mellom bedrifta og tillitsvald.
Tøff prosess
Heile 15 av medlemmene i klubben er studentar, og alle er mellom 18 og 30 år gamle. Dei reagerte blant anna på uføreseieleg arbeidstid, og vaktlister som kom dagen før dei var sette opp på jobb.
Dei tilsette fortalde også om ein tøff prosess i arbeidet med å etablere ei tariffavtale. Eigarane skal ha trua med permitteringar og konkurs, ha trua tillitsvald med sparken og forsøkt å kaste ut ein Fellesforbundet-representant frå restauranten.
p
Godt samarbeid
Det kjente ikkje bedrifta seg igjen i, og forsikra om at dei ikkje gjer forskjell på organiserte og uorganiserte tilsette.
– Vi tar omsyn til dei tilsette sine ønskar, og har derfor signert tariffavtala. Vi inviterer til eit godt samarbeid framover, både med tillitsvalde og Fellesforbundet, sånn at vi saman kan få til gode løysingar som er til det beste for dei tilsette og bedrifta, formidlar styreleiar Anders Aasen i ein e-post til Magasinet.
Pizzarestaurant-kjedene Peppes Pizza og Pizzabakeren i Trondheim, har allereie tariffavtale. Dermed er det snart full tariffdekning på pizza-marknaden i byen.
