Tormod Ytrehus

tormod@lomedia.no

Ei rekrutterings-kampanje frå hurtigmatkjeda McDonald's har fått fleire til å stegle. På reklameplakatane som mange har observert i bybildet, står det:

• «Å jobbe på McDonald's er så stress at du faktisk lærer deg å mestre det».

• «Det eneste som er mer stress enn å jobbe på McDonald's er å prøve å finne en sykt chill jobb».

• «Søk jobben 7 av 10 ikke vil ha».

Alle blir avslutta med: «Søk stress. Så lærer vi deg å mestre det».

McDonald's-tilsette: – Provosert

– Eg blir litt provosert, seier skiftleiar og tillitsvalt André Kamau (21) på McDonald's Arken i Bergen.

Restauranten fekk på plass tariffavtale med Fellesforbundet i 2021, etter ein periode med underbemanning og knallhardt arbeidspress dokumentert av Arbeidstilsynet.

Etter eit skifte i leiinga begynte ting å gå skeis igjen i haust, fortel Kamau.

– Det å kalle McDonald's for stressmeistring, er som å seie at ein lærer nokon å svømme ved å kaste dei på djupt vatn.

Han fortel om gråtande tilsette under hektiske vakter, truande kundar når maten ikkje kjem i tide og tilsette som blir igjen på jobb etter arbeidstid for å hjelpe til.

– Det er ikkje den typen stress ein vil ha, meiner Kamau.

Han seier mykje av stresset kjem frå leiinga. Han seier dei pressar på for at tilsette skal prestere betre og levere mat kjappare, samtidig som dei kuttar bemanning og alt dei kan spare pengar på.

– Det er ganske lett å utnytte ungdommar når det er første jobben og dei ikkje kjenner rettane sine, poengterer han.

Tillitsvalt André Kamau på McDonald's Arken i Bergen

Privat

Heller ikkje ein annan McDonald's-tilsett vi har snakka med har sansen for rekrutterings-kampanjen.

– Det er ein svært dårleg reklame for å få unge menneske ut i jobb.

– Samfunnet er allereie så stressande at eg trur ingen ungdom vil utsette seg for meir stress ved å søke på jobb hos McDonald's. Så her føler eg dei bommar veldig.

Les også: Maria (24) reiser Norge rundt for å gi ungdom hjelpen hun aldri fikk

Fellesforbundet: Tar ikkje rolla si som arbeidsgivar for unge seriøst

McDonald's er ifølge selskapet ein av Norges største arbeidsgivarar blant unge, ein av Norges største restaurantkjeder og har over 5.000 tilsette.

Ungdomssekretær Joakim Hagen i Fellesforbundet reagerer sterkt på at unge som kanskje har sitt første møte med arbeidslivet, blir møtt med «søk stress» som om det er noko positivt.

– Stress er ikkje positivt, seier han.

Stress kan føre med seg feil og gå ut over helsa både fysisk og psykisk, påpeikar han. Dei fleste arbeidsgivarar han snakkar med, jobbar med å forhindre stress.

Rekrutterings-kampanjen er uprofesjonell, og McDonald's tar ikkje rolla si som arbeidsgivar for unge seriøst, meiner Hagen og ungdomsutvalet i Fellesforbundet.

McDonald's bør heller lytte til dei tilsette og finne ut kva dei kan gjere for å halde på tilsette og gjere arbeidskvardagen deira betre, meiner han.

Undomssekretær Joakim Hagen i Fellesforbundet.

Håvard Sæbø

McDonald's kjenner seg ikkje igjen

McDonald's Norge har jobba mykje med restaurantane i Bergen etter rapporten frå Arbeidstilsynet i 2021, fortel kommunikasjonssjef Kristina Johansen, og alle punkta i rapporten er gjort noko med.

Ho tilbakeviser skildringa frå tillitsvalt Kamau om forholda på restauranten i Åsane.

Ho seier at selskapet har hatt sluttsamtalar med alle som har slutta på McDonald's Arken, og at dei som har slutta ikkje har hatt desse tilbakemeldingane. Ho seier at restauranten har 17 prosent høgare bemanning enn andre restaurantar, at skiftleiarar har frie tøyler til å hente inn folk ved behov og at restauranten er overbemanna i helgene. Og ho seier at medarbeidarsamtaler viser at folk trivest på jobb.

– Men vi er bevisste på at det kan bli betre, og det er ein kontinuerleg oppgåve, legg ho til.

Handlar om stressmeistring

Om rekrutteringskampanjen seier ho:

– Vi er først og fremst opptatt av å få fram stressmeistringa.

Ho viser til at det er forskjell på positivt stress der du skal vere skjerpa og prestere, og negativt stress.

Ei undersøking blant tilsette viser at åtte av ti tilsette opplever stressmeistring på McDonald's, forklarer ho.

Kommunikasjonssjefen seier stressmeistring er noko selskapet har jobba mykje med, og noko dei arrangerte ein stor konferanse om førre veke – der Fellesforbundet ikkje svarte på invitasjonen.

Sissel M. Rasmussen

– Vi er einig med Fellesforbundet i at det viktigaste er eit godt og trygt arbeidsmiljø for unge. Det handlar om god opplæring og oppfølging sånn at det ikkje blir negativt stress på jobb. For det kan vere hektisk å jobbe på McDonald's.

Ho seier turnoveren, delen tilsette som sluttar, er 15 prosent – noko ho seier er lågt i bransjen.

– Men har dokker ikkje bomma når så mange opplever kampanjen som provoserande?

– Vi skjøner at den er dristig og at vi set ting på spissen. Men vi opplever at vi får veldig bra respons frå folk som har jobba og jobbar innanfor servicebransjen. Og det er bra at kampanjen skaper debatt om korleis vi tar imot unge menneske inn i arbeidslivet.

Les også: I år må lønna øke mer enn prisene, krever LO