Tormod Ytrehus

tormod@lomedia.no

Fellesforbundet og Norsk Industri får avslag frå Arbeids- og sosialdepartementet i eit brev 17. september.

LO-forbundet og NHO-landsforeininga ba om plassar i det statlege utvalet TBU som set saman talgrunnlaget for norske lønnsoppgjer.

Fellesforbundet og Norsk Industri forhandlar i det såkalla frontfagsoppgjeret. Resultatet derfrå legg føringar for alle andre lønnsoppgjer i Norge.

Mye delt: Hva er en vanlig lønn i Norge? Dette sier tallene

For utydeleg

I eit brev sendt til TBU i starten av august krev frontfagspartane at årslønnsveksten i frontfaget kjem tydelegare fram i TBU-rapportane.

Bakgrunnen skal vere vårens kritikk mot praktiseringa av frontfagsmodellen, frå Unio og forbunda Sjukepleiarforbundet og Utdanningsforbundet. Dei peika på at lønnsveksten etter fjorårets lokale lønnsforhandlingar i industrien var større enn den økonomiske ramma frå frontfagsoppgjeret, mens lærarar og sjukepleiarar i større grad fekk lønnsvekst i tråd med ramma. Fellesforbundet og Norsk Industri trekker derimot fram at resultatet var i tråd med ramma innanfor Industriovereinskomsten, sjølve frontfaget.

«Tallene fra TBU må på en entydig måte få frem hva som ble det endelige resultatet fra frontfagsforhandlingene foregående år», heiter det i brevet signert Jørn Eggum og Stein Lier-Hansen.

«Denne utydeligheten har som kjent bidratt til at det skapes usikkerhet om modellens bærekraft.»

Se også: Dette er snittlønna i over 350 yrker

For seint

Fellesforbundet og Norsk Industri meiner også den endelege rapporten frå TBU kjem for seint.

«Slik vi har opplevd det de siste årene, har TBU foretatt nye vurderinger som endrer premissene under forhandlingene. Dette forstyrrer forhandlingene på en negativ måte», meiner dei.

Mye lest: Hva er minstelønna i Norge? Her er oversikten

Men får ikkje plass

På bakgrunn av erfaringane ønskte Fellesforbundet og Norsk Industri plassar i utvalet.

«Sammensetning av TBU må gjenspeile frontfagets sentrale posisjon for den norske lønnsdannelsen. Det er ikke tilstrekkelig at samfunnsøkonomene i hovedorganisasjonene er representert. Det må også de reelle partene være», meiner dei.

Departementet viser i svarbrevet til at berre hovudorganisasjonane er representert i utvalet, i likskap med Kontaktutvalet til regjeringa. LO og NHO har to representantar kvar som indirekte representerer forbund og landsforeiningar, påpeikar Arbeids- og sosialdepartementet.

«Departementet vurderer at utvalget med dagens sammensetning har den nødvendige kompetansen til å oppfylle TBUs rolle og til at hovedorganisasjonenes representanter kan ivareta hensyn til forbund og landsforeninger på en god måte», heiter det i svarbrevet underteikna ekspedisjonssjef og fagdirektør i departementet.

TBU-leiar og SSB-sjef Geir Axelsen har sagt til Magasinet for fagorganiserte at utvalet ønsker å levere eit best mogleg talmessig bakgrunnsmateriale som møter behovet til forhandlingspartane. Utvalet skal vurdere grundig korleis førespurnaden skal følgast opp, lova han.