Tormod Ytrehus

tormod@lomedia.no

Det statlege utvalet TBU leverer årleg rapportar som blir brukt som eit talgrunnlag i norske lønnsoppgjer.

Utvalet har medlemmer frå Statistisk sentralbyrå (SSB), hovudorganisasjonane i arbeidslivet og ei rekke departement. Ingen enkelte fagforbund eller arbeidsgivarforeiningar er representert.

Det vil fagforbundet og arbeidsgivarforeininga i industrien ha ei endring på. Magasinet for fagorganiserte har fått innsyn i eit brev til TBU frå Fellesforbundet-leiar Jørn Eggum i LO og Norsk Industri-sjef Stein Lier-Hansen i NHO, som inneheld tre krav:

• Fellesforbundet og Norsk Industri ber om plassar i utvalet.

• Dei vil at rapporten i større grad vektlegg kva som har vore årslønnsveksten innanfor industrien, frontfaget i norske lønnsoppgjer.

• Den endelege rapporten må vere på plass før 8. mars når lønnsoppgjeret i industrien startar, krev forhandlingspartane.

Kva er eigentleg frontfagsmodellen? Her får du svar

For seint …

TBU kjem kvart år med ein førebels rapport i februar, mens den endelege rapporten ikkje kjem før i slutten av mars. At talgrunnlaget endrar seg etter at lønnsoppgjeret i industrien er i gang, skal ha vore frustrerande for Fellesforbundet og Norsk Industri.

Rapporten gir blant anna oversikt over lønnsutviklinga, prisutviklinga (inkludert eit anslag for prisstigning) og utviklinga i konkurranseevna til norsk næringsliv.

«Slik vi har opplevd det de siste årene, har TBU foretatt nye vurderinger som endrer premissene under forhandlingene. Dette forstyrrer forhandlingene på en negativ måte», heiter det i brevet.

… og for utydeleg

«Tallene fra TBU må på en entydig måte få frem hva som ble det endelige resultatet fra frontfagsforhandlingene foregående år», skriv dei vidare.

Her skal bakgrunnen vere kritikken mot praktiseringa av frontfagsmodellen, frå Unio, forbunda Norsk Sjukepleiarforbund og Utdanningsforbundet i vår.

Frontfagsmodellen går ut på at lønnsveksten i arbeidslivet skal følge lønnsveksten i den eksporterande industrien, frontfaget. Konkret skjer det gjennom at Fellesforbundet og Norsk Industri i lønnsoppgjeret for industrien blir einige om ei økonomisk ramme for auka kostnader for arbeidsgivarane. Denne ramma legg deretter føringar for lønnsforhandlingane i alle andre bransjar i privat og offentleg sektor.

Sjukepleiarane og lærarane trekte før årets oppgjer fram at lønnsveksten i industrien var over 2 prosent etter fjorårets lokale lønnsforhandlingar, ifølge TBU, altså over den økonomiske ramma på 1,7 prosent i frontfagsoppgjeret. Samtidig hadde sjukepleiarane og lærarane i større grad fått lønnsvekst i tråd med frontfagsramma.

Lønnsoppgjøret forklart: Hvordan kan 2,25 kroner i timen bli 2,7 prosent?

Fellesforbundet og Norsk Industri trekker på si side fram at lønnsveksten i årets TBU-rapport er anslått til 1,7 prosent i sjølve frontfaget, Verkstaddelen i Industriovereinskomsten. «Denne utydeligheten har som kjent bidratt til at det skapes usikkerhet om modellens bærekraft», skriv dei i brevet til TBU.

Vanlegvis har lønnsveksten i privat sektor følgt frontfagsramma, understrekar dei, men unormale år som korona-året 2020 kan føre til unntak.

Vil ha plassar ved bordet

Formålet med frontfagsmodellen er at lønnsveksten i andre bransjar ikkje pressar opp lønna i industrien meir enn at den kan konkurrere med industrien i utlandet og på den måten skaffe Norge eksportinntekter.

På grunn av erfaringane frå tidlegare oppgjer, ber Fellesforbundet og Norsk Industri om plassar i utvalet frå hausten av.

«Sammensetning av TBU må gjenspeile frontfagets sentrale posisjon for den norske lønnsdannelsen. Det er ikke tilstrekkelig at samfunnsøkonomene i hovedorganisasjonene er representert. Det må også de reelle partene være. Dette vil styrke koblingen mellom frontfaget og TBUs viktige arbeid før kommende hovedoppgjør», skriv dei.

Vurdere grundig

TBU-leiar og SSB-sjef Geir Axelsen seier til Magasinet at utvalet ønsker å levere eit best mogleg talmessig bakgrunnsmateriale som møter behovet til forhandlingspartane. Utvalet har hatt eit møte om saka, og skal vurdere grundig korleis førespurnaden skal følgast opp.

Samansettinga av TBU er opp til Arbeids- og sosialdepartementet. Departementet vil ikkje seie til Magasinet kva svaret på ønsket frå Fellesforbundet og Norsk Industri kjem til å bli.

Vanskelege ord og uttrykk? Sjekk Tariffleksikonet