Tormod Ytrehus

tormod@lomedia.no

Krisa har så langt ført til at over 4000 lærlingar er permitterte.

Fellesforbundet er bekymra for konsekvensane for rekrutteringa av nye fagarbeidarar, dersom læretida blir forlenga og fagprøvane utsette.

– Dette må ikkje gå på kostnad av inntaket av nye lærlingar, åtvarar forbundssekretær Per Skau og viser til den høge etterspurnaden etter fagarbeidarar i norsk arbeidsliv.

Fellesforbundet oppfordrar derfor alle partar til ein dugnad for å hjelpe lærlingane gjennom korona-krisa.

Skal ikkje permitterast

Skau minner om dei spesielle reglane for permittering av lærlingar, avtalt mellom LO og NHO.

Lærlingar kan berre permitterast dersom lærebedrifta ikkje lenger kan gjennomføre opplæring.

– Og sjølv etter det, bør bedriftene strekke seg langt for å halde lærlingen i opplæring. Det står ofte berre på kreativitet og vilje, meiner Skau.

Saka held fram under bildet.

FAGPRØVER: Fag- og sveineprøvene må gjennomførast, sånn at lærebedriftene kan ta imot nye lærlingar. Det meiner Fellesforbundet og forbundssekretær Per Skau.

Håvard Sæbø

Fellesforbundet oppfordrar dei tillitsvalde på arbeidsplassane til å ta opp saka med bedrifta, for å finne ei løysing for lærlingane.

Lærlingar bør ta kontakt med tillitsvalde dersom dei har problem eller er urolege, oppfordrar forbundet.

Alternativ opplæring

Opplæringskontora har også eit spesielt ansvar, meiner Fellesforbundet.

Desse kontora er part i lærekontraktar, eigd av lærebedriftene og finansiert av lærlingtilskotet frå staten.

– No må dei hive seg rundt for å lage alternativ for permitterte lærlingar. Om ikkje, meiner vi at dei sviktar den oppgåva dei har tatt på seg, seier forbundssekretær Skau.

Han viser også til fylkeskommunane si plikt til å gi vidaregåande opplæring.

– Dei bør jobbe for å finne alternative måtar å gi opplæring på, digitalt og gjennom skoleverkstadar. Det er tid for å tenkje kreativt.

Nye reglar

Regjeringa lanserte i påska nye tiltak for lærlingar, som skal bidra til at lærlingar får fag- og sveinebrevet sitt til rett tid.

Tiltaka skal vere utarbeidd i tett samarbeid med LO og NHO, forbund og landsforeiningar.

Magasinet har sett på forslaget til mellombels forskrift til opplæringslova, som vart sendt ut på høyring for ei veke sidan.

Forslaget består av tre endringar:

• Lærlingar som har bestått fagprøva, kan avslutte læretida inntil tre månader tidlegare.

• Lærlingar treng ikkje forlenge læretida dersom dei har vore permittert inntil tre månader.

• Prøvenemndene får moglegheit til å gjennomføre prøva alternativt, så lenge eitt medlem er fysisk til stade.