Tormod Ytrehus

tormod@lomedia.no

Strippeklubbar i Trondheim vil etter alt å dømme ikkje få skjenkebevilling. Kravet er nemleg ein del av det raudgrøne bystyrefleirtalet sin samarbeidsplattform.

Fleirtalet består av Ap, SV, MDG og Sp. I eit komitemøte 2. juni fekk kravet også støtte frå Raudt og Pensjonistpartiet.

Fellesforbundet-avdelinga som organiserer tilsette i hotell- og restaurantbransjen i Trondheim, stiller seg derimot negativ til kravet.

Arbeidsplassar

Temaet var ein del av ei høyring tidlegare i år om endringar i reglane for skjenkebevilling i kommunen. I dag har Trondheim berre ein strippeklubb, Dreams Showbar.

«Vår vurdering må være at et slikt moralsk argumentert grunnlag vil føre til at ansatte mister jobbene sine, som mange har hatt i flere år på same plass med gode lønns- og arbeidsvilkår», skriv Fellesforbundet avdeling 250.

Avdelinga anbefaler «at man heller ser på bedre og hyppigere kontroller på slike steder, både fra Arbeidstilsynet og andre offentlige instanser».

Ikkje ulovleg

– Det er ikkje ulovleg med stripping som underhaldningsform, seier avdelingsleiar Børge Ånesen til Magasinet for fagorganiserte.

– Vi er opptatt av at det moralske ikkje må settast framfor det prinsipielle. Vi har tatt eit prinsipielt standpunkt.

Også Trøndelag politidistrikt, NHO Trøndelag og Næringsforeninga i Trondheimsregionen stiller seg negativ til at strippeklubbar skal miste skjenkebevillinga. Dei viser alle til at stripping ikkje er ulovleg. Det same gjer Kommunedirektøren (Rådmannen).

Minstelønn

Forutan skjenkebevillinga til strippeklubbar, har Fellesforbundet-avdelinga uttalt seg om krav om minstelønn for å få skjenkebevilling.

– Vi følgde same linja når vi svarte på endringar i regelverket om minstelønna, seier Ånesen.

Avdelinga viser til at minstelønna i bransjen er lovfesta og allmenngjort av partane i arbeidslivet. I tillegg meiner dei utestadane må kunne vise til lovpålagde arbeidskontraktar og lønnsslippar for å få skjenkebevilling.