TORMOD YTREHUS

tormod@lomedia.no

Roy Pedersen går av som leiar for LO i Oslo i mars, melder Klassekampen. Han har då vore LO-sjef i Oslo i ti år.

– Eg fyller 66 år, då er det passeleg å runde av, seier han til avisa.

• Følg oss på Facebook!

Kandidat frå statleg sektor

No lanserer NTLs fylkesutval i ei pressemelding Natalia Zubillaga som kandidat til å ta over etter Pedersen. Zubillaga er i dag nestleiar i LO i Oslo og konstituert leiar for NTL ved Universitetet i Oslo.

(Saka held fram under bildet.)

Natalia Zubillaga, nestleiar for LO i Oslo, er aktuell til leiarvervet.

Ole Palmstrøm (arkivfoto)

Fylkesutvalet meiner det er på tide med ein kvinneleg leiar og peikar på at det er tjue år sidan sist. I tillegg meiner dei det er på tide med ein leiar som har yrkesbakgrunn frå statleg sektor, noko som kan bidra til å styrke organisasjonsgraden blant folk med høgare utdanning. Pedersen hadde bakgrunn frå byggebransjen og privat sektor.

Partipolitisk uavhengig

LO i Oslo stiller blant anna sjølvstendige krav til alle dei politiske partia i forkant av kommuneval, slik LO i Trondheim også har tradisjon for å gjere. I tillegg har lokalorganisasjonen lagt vekt på å bygge alliansar, også med aktørar i fagrørsla utanfor LO.

– Natalia vil bygge vidare på arbeidet Roy Pedersen har ført an for å gjere LO i Oslo til ein maktfaktor i Oslo. Ho vil også sikre at lokalorganisasjonen framleis er eit samlingspunkt for alle gode krefter i fagrørsla og ein stad ein kan bygge alliansar med andre politiske aktørar, heiter det i pressemeldinga frå NTLs fylkesutval.

– Ho er også opptatt av at LO i Oslo skal vere ein sjølvstendig kraft, som er partipolitisk uavhengig, men ikkje politisk nøytral, der vi har eigne analyser og fremmar eigne krav.