Tormod Ytrehus

tormod@lomedia.no

Håvard Sæbø

has@lomedia.no

RAUFOSS: Veggmåleriet vart lagd i høve 125-års-jubileet i fjor. Det var ferdig i sommar, men vart avduka under den årlege Industrikonferansen i slutten av oktober.

Eller rettare sagt: Plaketten vart avduka. Det var litt vanskeleg å avduke det 70 kvadratmeter store kunstverket, humra fagforeiningsleiar Bjørn Sigurd Svingen.

– Dette er noko av det artigaste eg har jobba med på lang tid, sa han.

– Jo større gåve jo meir stas. Og denne er i særklasse den største eg har mottatt, sa direktør i Industriparken, Øivind Hansebråten.

STAS: Det er stas å motta ei så stor gåve frå industriarbeidarane, fortalte direktør i Raufoss Industripark, Øivind Hansebråten.

Håvard Sæbø

Gåve til heile byen

– Vi har tradisjon for å gi jubileumsgåver, men vi hadde ein lang prosess for å forankre og diskutere om vi skulle gi ei så stor gåve til arbeidsgivarane, fortel Svingen til Magasinet.

Kvar av dei 2.500 medlemmane har bidratt med cirka 40 kroner.

– Men det er like mykje ei gåve til lokalbefolkninga, som medlemmane er stolte over, seier fagforeiningsleiaren.

Han forklarer at bygget er opent for publikum, synleg frå Raufoss sentrum og at veggmåleriet allereie har blitt eit populært foto-motiv.

– Det er så mange monument over nedlagt industri, men vi ville vise den levande industrien, fortel han.

Bestillinga var at måleriet skulle vise menneske, ikkje berre maskiner. Og det skulle vise «fortid, notid og framtid».

GENERASJONAR: Ein levande Raufoss-industri for nye og gamle generasjonar. Det er noko veggmaleriet «Generasjonar» skal symbolisere, fortel fagforeiningsleiar Bjørn Sigurd Svingen og kunstnar Simon Alfredo.

Håvard Sæbø

Generasjonar med industri

Kunstverket heiter «Generasjoner» og viser ei jente og bestefaren – som høvesvis skal og har jobba i industrien.

Også den legendariske Raufoss-mopeden, lokalprodusert på 50- og 60-talet, er med.

120 sprayboksar med maling gjekk med under arbeidet, fortel kunstnaren Simon Alfredo.

– For meg var Raufoss ei ufortalt historie, bortsett frå eit fotballag nede i divisjonane. Det har vore kjempeinteressant å finne ut kor mange som jobbar her og kor viktig industrien er for Innlandet.

– Raufoss skal vere ein industristad i hundre år til. Det skal måleriet symbolisere for generasjonane som kjem. Ungdommane skal jo bli her i Raufoss, ikkje flytte til Oslo, avsluttar Alfredo med eit smil.