Tormod Ytrehus

tormod@lomedia.no

Tillitsvald Atle Forfang Rostad fekk i november ei skriftleg åtvaring frå arbeidsgivaren Kaefer Energy, noko som er det nærmaste ein tilsett kjem oppseiing.

Fellesforbundet-klubben meiner åtvaringa er gjengjelding for at Rostad er ein aktiv og dyktig tillitsvald som blant anna har stukke seg fram i kampen mot ulovleg innleige.

Før jul rykka administrerande direktør Stein Lier-Hansen i Norsk Industri ut til medlemsbedrifta sitt forsvar.

Han hevdar tillitsvalde i andre bedrifter «nærmest truer med boikottaksjoner» mot Kaefer.

«Dette vil Norsk Industri advare mot. Den type boikottaksjoner er i strid med norsk lovgiving og kan ikke aksepteres», skriv Stein Lier-Hansen i ein epost til Magasinet for fagorganiserte og legg til at arbeidsgivarforeininga følger saka nøye.

Bakgrunn: Norsk Industri-sjefen går i strupen på bedriftsklubb og fagforeining

Støtte frå Aker-tilsette

Bakgrunnen er blant anna ein uttalelse frå LO i Aker ASA, etter kva Magasinet forstår.

LO organiserer 4.500 tilsette i Aker-selskapa – gjennom Fellesforbundet, FLT, Handel og Kontor, Industri Energi og EL og IT.

I uttalelsen krev LO i Aker ASA at saka i Kaefer blir løyst utan sanksjonar.

«Om ikkje vil me vurdere å ta opp saka med dei av våre selskap som nyttar Kaefer som underleverandør. Selskap som i plassen for konstruktiv dialog og samarbeid rettar usaklige angrep på tillitsvalde har ingen plass i våre leverandørkjeder.»

Etter utspelet frå Norsk Industri har også LO-klubbane i Aker Solutions – på vegner av sine 3.500 medlemmer – gjentatt meldinga frå LO i Aker ASA gjennom ein eigen uttalelse.

Aksjonerte: Kaefer prøver å bli kvitt brysom tillitsvalgt, mener aksjonister

Lar seg ikkje skremme

Konserntillitsvald Atle Tranøy i Aker ASA lar seg ikkje skremme av åtvaringa frå Stein Lier-Hansen.

– Vi står ved vår støtte og det vi har sagt. Om det er nokon som opptrer uproporsjonalt i denne saka, er det openbert bedrifta, seier Tranøy til Magasinet.

– Om Stein Lier-Hansen er opptatt av å forsvare norske arbeidslivsstandardar, burde inngangen vore ein heilt annan enn å gå ut på denne måten. Han burde heller tatt eit konstruktivt initiativ for å finne ei minneleg løysing.

LAR SEG IKKJE SKREMME: Konserntillitsvald Atle Tranøy for LO i Aker ASA.

Erlend Angelo

Tranøy meiner selskapa sjølvsagt står fritt til å velje underleverandørar.

– Det er brei einigheit i Aker om at ein skal stille seriøsitetskrav til underleverandørar og innleigeselskap. Det er vesentlege kriterium som går fram i styrande dokument, forklarer han.

Står på sitt

Også Fellesforbundet-klubben på Aker Verdal har i eit brev til Kaefer Energy, kravd at kampanjen mot Atle Forfang Rostad blir lagt død. Klubben har 430 medlemmer på verftet i Trøndelag.

«Verkstedklubben Kværner Verdal vil ikke sitte stille i båten og se på dette forsøket på fagforeningsknusing. Hvis Kaefer Energy fortsatt ønsker å være en del av det useriøse arbeidslivet så vil vi gjøre det vi kan for å påvirke vårt selskap til å unngå fremtidig samarbeid med dem», skriv klubbleiar Ståle K. Johansen.

Han lar seg heller ikkje skremme av åtvaringa frå Norsk Industri-sjefen.

– Verkstadklubben står ved vår støtte til klubben i Kaefer og Rostad. Det er ingen tvil. Dette er eit angrep på ein aktiv tillitsvald som gjer jobben sin, seier Johansen til Magasinet.

LAR SEG HELLER IKKJE SKREMME: Klubbleiar Ståle K. Johansen på Aker Verdal.

Håvard Sæbø

– Det er overraskande at Stein Lier-Hansen går til frontalangrep og ikkje ønsker at den norske arbeidslivsmodellen og partane sine rettferdige verkemiddel skal fungere. Han vel å bruke ordet boikott. Vi står på retten til å ha ei meining og prøve å påverke verksemda vår til å ha sunne samarbeidspartnarar. Det handlar om den norske arbeidslivsmodellen der klubben har medverknad i korleis utviklinga til selskapet skal vere.

– Vi har gode grunnar til å tru at Aker Solutions vil høyre på oss. Haldninga til eit seriøst arbeidsliv og aktive tillitsvalde står sterkt i leiinga, seier klubbleiaren i Verdal.

Opprop: Fleire hundre har signert opprop mot trakassering av tillitsvald