Øystein Windstad

oystein.windstad@lomedia.no

Mellom fanene til Norsk Arbeidsmandsforbund og flagga til NTL og Fagforbundet var det ein heil del gule hanskar å sjå utanfor stortinget torsdag ettermiddag.

Også Ap-leiar og statministerkandidat Jonas Gahr Støre tok på seg ein gul hanske for å markere solidaritet med reinhaldarar, etter å ha vore med reinhaldarar på jobben:

– Eg har fått høyre om fagstoltheit, om viktigheita av å vere organisert og om at politikken spelar ei viktig rolle for å sikre seriøsiteten og anstendige løningar. Eg har også fått høyre om arbeidspress og dessverre alt for låge løningar. Difor seier eg som Arbeidsmandsforbundet i dag: Rettferd for reinhaldar, sa Støre.

• Dette er de 25 dårligst betalte yrkene i Norge

Får ikkje løn mellom arbeidsstader

Ei av dei som heldt appell og som veit kva dette dreier seg om, er Solveig Samuelsen som har jobba som reinhaldar i 22 år.

Ho er tillitsvalt i Arbeidsmandsforbundet og seier dette om dei største utfordringane for reinhaldarane:

– Det løn og arbeidstida. Vi har fleire arbeidsstadar får vi ikkje betalt mellom plassane. På den måten jobbar vi gratis. Det er det eg vil trekkje mest fram og som vi slit mest med, løn og arbeidstid.

– Sjå oss

Også situasjonen for reinhaldarane som blei overført frå Forsvarbygg til ISS var tema under markeringa. Reinhaldarane risikerer blant anna å miste millionar i pensjon:

– Saka er urettferdig. Mange av desse har jobba heile sin yrkeskarriere i Forsvarsbygg. Mange har eit eller to år igjen før pensjon, og får ingen ting tilbake. Det er blodig urettferdig spør du meg.

– Kva er ditt bodskap til politikarane?

– Aksepter oss, respekter oss og sjå oss. Ikkje gøym oss vekk. Før år 2000 jobba vi berre natt, kveldar og morgon. Vi snudde dette i 2000, no går vi tilbake. No blir det meir og meir morgon og natt og vi syns mindre og mindre. Det må nokon gjere noko med. Der kan politikarane bidra litt, sa Solveig Samuelsen, tillitsvalgt i NAF.

– Dette er vår felles kamp

Kjersti Barsok er 1. nestleiar i NTL og var ein av appellantane. Ho seier at NTL står last og brast saman med reinhaldarane i Nord-Norge som får dårlegare løn og arbeidsvilkår:

– NTL har jobba mykje med denne saka og syns dette er ein kald politikk frå regjeringa. Saka blir berre verre og verre. Vi har jobba for at reinhaldarar ikkje skal miste AFP-retten, men vi har sett at det ikkje er noko vilje frå regjeringa til å sjå på dette. Reinhaldarane har møtt ei kald skulder og ein iskald politikk. Staten burde vere i ei særstilling i å behandle folka sine skikkeleg. Det har dei ikkje gjort.

– Kva er bodskapet ditt til reinhaldarar?

– Deira kamp er vår kamp og vi står saman. Vi i NTL organiserer alle grupper på arbeidsplassane. Vi er veldig glad for å ha reinhaldarar i arbeidsplassfellesskapet saman med oss, at vi har same arbeidsgjevar og same vilkår. Dette blir utfordra av den politikken som blir ført no, fortel Barsok.

-FELLES KAMP: 1. nestleiar i NTL, Kjersti Barsok fortel at dei jobbar dagleg med rettane til reinhaldarar og at dei ikkje vil gje seg før blant anna ISS-reinhaldarane som blei overført frå Forsvarsbygg til ISS får skikkelege arbeidskår.

Øystein Windstad

Vil ha strengare reguleringer

Brede Edvardsen er forbundssekretær i Arbeidsmandsforbundet og har tidligare jobba innan reinhald av vindauger. Han er kritisk til einsidig fokus på pris når det offentlege skal kjøpe inn reinhaldstenster. Han fortel dette fører til dårlegare løner og arbeidsvilkår:

– Eg ser på reinhaldsbransjen som botnplanken i norsk arbeidsliv. Greier du ikkje å halde den får du problem i resten av arbeidslivet. Det ein såg i reinhaldsbransjen for ti år sidan smittar no over til andre bransjar.

– Kva bodskap har du til reinhaldarane?

– Dei må tore å seie ifrå. Det er eit problem at dei er redde og engstelege. Mange har innvandrarbakgrunn og få andre alternativ i jobbmarkedet. Då ender det med at dei ikkje torer å seie ifrå og gjer som sjefen seier. Gjer ein ikkje det, får ein ikkje endra noko. Det handlar om å stole på fagforeiningane og seie ifrå at sånn kan vi ikkje ha det. Vi må ikkje vere så snille og greie, meiner Edvardsen i Arbeidsmandsforbundet.

Les også

• Politikerne snudde. De kommunale renholderne beholder jobbene i Hole