TORMOD YTREHUS

tormod@lomedia.no

– Eg ser det som ei anerkjenning av at forskinga og verksemda vi driv i Fafo er verdsette i arbeidarrørsla. Det blir ein stolt og glad for, seier Dølvik.

Tysdag fekk Fafo-forskar Jon Erik Dølvik Eilert Sundts forskingspris 2018 under eit møte i Oslo Arbeidersamfunn. Prisen får han for mangeårig arbeid med arbeidslivsforsking og særleg bidrag knytt til den norske modellen.

– Eg har lagt merke til at Dølvik har ein fantastisk tendens til å dukke opp der tillitsvalte i norsk og nordisk arbeidarrørsle diskuterer viktige ting. Han er utruleg engasjert, held foredrag og bidrar med kompetansen sin. Og det han kjem med er veldig nyttig – han er ikkje ein «poster boy», forklarer Kjetil Staalesen, studieleiar i Oslo Arbeidersamfunn.

• LO vil sikre sliterne en bedre pensjon. Her er alle kravene fra LO i årets lønnsoppgjør

Den norske modellen

Dei seinare åra har Dølvik leia Arbeiderbevegelsens nordiske samarbeidskomité (Samak) sitt forskingsarbeid om dei nordiske modellane. Juryen peikar på at forskaren har bidratt til å synleggjere betydninga av og innhaldet i «Den norske modellen».

– Med prisen belyser vi at han har klart å gjere den norske modellen og partssamarbeid til heidersomgrep som alle ønsker eigarskap til. Han har bidratt til at NHO no seier at det er viktig at norske arbeidstakarar organiserer seg. Det sa dei ikkje for tjue år sidan, seier Staalesen.

Staalesen viser til at sjølv den borgarlege statsministeren no snakkar varmt om organisering. Det trur han er ein konsekvens av at det finst meir kunnskap om partssamarbeidet.

– Det var ingen som snakka om den norske modellen for tjue år sidan. Då tenkte folk på ein vakker mann eller kvinne når dei høyrte omgrepet. No tenker folk på kollektive forhandlingar og eit organisert arbeidsliv. Og det har Dølvik bidratt til. Det gjer at arbeidarrørsla står sterkare, og det er vi takknemleg for, seier Staalesen.

• Frp: – Norge trenger flere som jobber i kjeledress

Anvendt forsking

I tillegg trekk Staalesen fram at tillitsvalte bruker kunnskapen om den norske modellen i konkrete forhandlingssituasjonar.

– Han har gjort mykje nyttig for folk som står i forhandlinssituasjonar kvar dag. Der er meiningar billeg. Men om du har kunnskap, då vinn du i forhandlingar, forklarer Staalesen.

I karrieren sin har Dølvik særleg jobba med utviklinga innanfor europeisk arbeidsliv og korleis EØS-avtala påverkar det norske arbeidslivet. Eit sentralt tema i forskingsarbeidet hans dei siste femten åra, har vore korleis ein kan motverke sosial dumping som følge av fri rørsle av arbeidskraft og tenester.

– Korleis er det at forskingsarbeidet du gjer blir teke så aktivt i bruk av samfunnsaktørar, Dølvik?

– Det er eit privelegium ved å jobbe på Fafo, og er ein motiverande faktor. Det er gledeleg at aktørane i samfunnet oppfattar kunnskapen vi bidrar til å bringe fram som relevant og nyttig. Kunnskap i seg sjølv er fånyttig om den ikkje blir tatt i bruk. Vi har aktive og engasjerte brukarar som gjer at det å drive med forskings- og kunnskapsutvikling er meiningsfullt.

• 17 historier om ulikhet i Norge

• Fafo-rapport: Delingsøkonomien kan utfordre den norske modellen

• Les flere saker om fagbevegelsen, arbeidsliv og politikk på vår forside