Tormod Ytrehus

tormod@lomedia.no

Frå 1. april vart reglane i arbeidsmiljølova for innleige stramma inn, og overgangsreglane for allereie inngåtte avtaler og kontraktar går ut 1. juli.

No er det berre verksemder med tariffavtale med eit stort fagforbund som kan leige inn frå bemanningsbyrå etter avtale med tillitsvalde (med unntak for reine vikariat, helsepersonell til mellombels arbeid og enkelte andre mindre grupper).

Eit krav i lova er vidare at dei tillitsvalde til saman må representere eit fleirtal av den kategorien arbeidarar innleiga gjeld.

Dei tillitsvalde treng derimot ikkje å vere tillitsvalde i fagforbundet som har tariffavtale med verksemda, har arbeidsminister Marte Mjøs Persen (Arbeidarpartiet) uttalt.

Det gjorde ho i eit skriftleg svar til Stortinget og Høgre-politikar Anna Molberg i februar, som FriFagbevegelse tidlegare har omtalt.

Fellesforbundet-tillitsvalde er bekymra

Svaret kom overraskande på fagrørsla, og advokaten til LO protesterte i eit brev til departementet i mars.

Men departementet stod fast på og utdjupa lovtolkinga i svaret til LO i april. Det same gjorde arbeidsministeren i eit svar til Stortinget og Mímir Kristjánsson i Raudt same månad.

I Fellesforbundet er fleire tillitsvalde no bekymra for at arbeidsgivarane skal etablere ein ny praksis der innleige blir avtalt med andre, kjenner Magasinet for fagorganiserte til.

Magasinet har skrive om at Kaefer Energy i april inngjekk ei avtale med verneombod om innleige på Johan Sverdrup-installasjonen i Nordsjøen.

Det gjorde dei etter at bedriftsleiinga og Fellesforbundet-klubben over mange år ikkje har klart å bli einige om innhaldet i ei avtale.

Statsråden ser ikkje behov for å endre lova

Kaefer-leiinga viste blant anna til det første svaret frå arbeidsministeren som forklaring på kvifor dei har avtalt innleige med verneomboda i staden for Fellesforbundet-klubben.

– Om initiativet til Kaefer-leiinga er innafor, må regjeringa gjere eit hastearbeid for å tette smottholet. Elles forsvinn heile meininga med lovendringa, sa tillitsvalt for Fellesforbundet, Atle Rostad, til Magasinet.

No har arbeidsministeren svart på eit nytt spørsmål frå Molberg blant anna om statsråden vil følge oppfordringa frå Rostad.

«Jeg ser ikke at det foreligger behov for ytterligere lovmessig klargjøring av dette», svarer Marte Mjøs Persen, men legg til:

«Vi vil i samarbeid med partene i arbeidslivet følge nøye med på utviklingen på disse områdene og på hvilken virkning regelendringene får, herunder også når det gjelder bruken av avtaler med tillitsvalgte om innleie».

Lønnshopp før sommarferien: Sjekk den nye minstelønna i ni bransjar