Tormod Ytrehus

tormod@lomedia.no

Forbundsstyret i Fellesforbundet vedtok måndag delegasjonane i alle dei store tariffoppgjera.

Eitt tariffoppgjer er ekstra viktig, og har alles auge på seg. 9. mars startar frontfagsoppgjeret, med frist 1. april. Frontfaget er Industriovereinskomsten mellom Fellesforbundet og Norsk Industri. Etter at dei har blitt einige, anslår LO og NHO ei ramme for lønnsveksten i heile industrien. Denne ramma bruker å legge føringar for alle andre lønnsoppgjer, og er der den samla lønnsveksten i Norge bruker å ligge.

Lønnsoppgjøret forklart: Slik bestemmes den nye lønna di

Industriovereinskomsten er også den største tariffavtala i privat sektor. Nesten 30.000 Fellesforbundet-medlemmer er omfatta av avtala og kan bli tatt ut i ein eventuell streik for å sette makt bak krava.

I år er krav nummer éin at kjøpekrafta skal auke, altså at lønna skal auke meir enn prisane. 17 tillitsvalde i Fellesforbundet har fått ansvar for at det også blir resultatet i forhandlingane med Norsk Industri.

Oversikt: Vet du når lønna di skal forhandles? Her kan du se når de ulike oppgjørene starter 

Dette er delegasjonen

Eit viktig prinsipp i Fellesforbundet er at minst halvparten av forhandlingsdelegasjonane skal vere omfatta av overeinskomsten dei forhandlar om, altså jobbe i bedrifter som har inngått tariffavtale med Fellesforbundet. Dermed vil resultatet av oppgjeret få direkte konsekvensar for fleirtalet av forhandlarane.

Vidare skal delegasjonane leiast av nokon frå forbundsleiinga eller administrasjonen i Fellesforbundet.

Innsikt: Fem punkter som gjør årets lønnsoppgjør ekstra vanskelig

Her er dei 17 tillitsvalde som utgjer årets frontfagsdelegasjon:

• Jørn Eggum, forbundsleiinga, forhandlingsleiar

• Kine Asper Vistnes, forbundsleiinga

• Bernhard Brunes, forbundsstyret

• Bjørn Sigurd Svingen, representantskapet

• Kristine Søilen, Bergen Engines, avdeling 5

• Mariann Rustad, Interfil AS, avdeling 670

• Hans-Petter Anker Bærem, Nexans Norway AS Halden, avdeling 75

• Morten Lage Jacobsen, Evry Card Services AS, avdeling 143

• Rune Eriksson, Aibel AS Avd Haugesund, avdeling 57

• Kai-Runar Svarstad, Linjebygg AS avd Molde, avdeling 65

• Jens Hermansson, Kaefer Energy AS Avd Stavanger, avdeling 25

• Stian Sagvold, Kværner AS Lokasjon Verdal, avdeling 108

• Tor Ivar Karlsen, Plasman AS, avdeling 23

• Johan Hovind, Rana Gruber, avd 143

• Jørn Inge Hestnes, Vard Group AS Avd Langsten, avd 31

• Rune Sundt Larsen, Kongsberg Defence & Aerospace AS, avdeling 6

• Richard Storevik, avdelingsleiar, avdeling 5

I tillegg deltar folk frå administrasjonen til forbundet, som ikkje har stemmerett, men hjelper til med praktiske oppgåver under forhandlingane.

Ordkrig mellom LO og Unio før lønnsoppgjøret: «Splittelse i fagbevegelsen fører til en alles kamp mot alle»

Brei representasjon

– Det er eit ærefullt oppdrag å sitte i ein forhandlingsdelegasjon, du har eit stort ansvar og blir vist stor tillit, seier forbundssekretær Kine Asper Vistnes til Magasinet for fagorganiserte.

Delegasjonen er sett saman med lokale tillitsvalde frå ulike industribedrifter, med så brei representasjon som mogleg, forklarer ho.

– Delegasjonen har kunnskap vi nyttar oss av i forhandlingane, om kva som skjer ute på arbeidsplassane og korleis endringar i tariffavtala vil verke. Vi er heilt avhengig av kompetansen dei har og å forankre forhandlingane på ein skikkeleg måte. Dei lokale tillitsvalde er forhandlingsstyrka vår, seier Vistnes.

Alle 17 har stemmerett under forhandlingane. Dei bestemmer om forhandlingane skal brytast eller vidareførast, anbefaler eit eventuelt resultat før det går til uravstemming eller bestemmer at medlemmene skal bli tatt ut i streik.

Forbundssekretær Kine Asper Vistnes skal saman med forbundsleiar Jørn Eggum leie Fellesforbundet-delegasjonen sine forhandlingar i det viktige frontfagsoppgjeret. Her frå kravoverrekkinga i frontfagsoppgjeret i 2020.

Håvard Sæbø

Mindre grupper

Frontfagsforhandlingane bruker også å ha eit såkalla engere utval, som er ei mindre gruppe med folk frå begge sider av bordet. Dei styrer forhandlingsprosessen og har avklarande møte under vegs. Frå Fellesforbundet bruker utvalet å bestå av forhandlingsleiaren, forbundssekretæren med politisk ansvar for området og eit anna medlem av delegasjonen. Altså: Jørn Eggum, Kine Asper Vistnes og éin av dei andre 15 tillitsvalde.

Frontfagsoppgjeret har dei siste oppgjera også hatt ulike arbeidsgrupper med folk frå begge delegasjonane, som diskuterer enkelttema.

Med stor sannsynlegheit kjem partane til å bryte forhandlingane på eit tidspunkt og be om hjelp frå Riksmeklaren. Det er vanleg i frontfagsoppgjera. Dei avgjerande forhandlingane vil sannsynlegvis skje rundt fristen 1. april, og partane bruker å forhandle også etter fristen. I 2020 vart dei einige 22 rekordlange timar på overtid.

– Det er viktig å halde humøret oppe og god stemning i delegasjonen under vegs, seier Vistnes.

Etter forhandlingane

Det er altså ikkje tradisjon for streik i frontfagsoppgjeret, men medlemmene har alltid siste ord. Etter at forbundet har fått informert om konsekvensane av eit resultat, skal alle Fellesforbundet-medlemmene som er omfatta av tariffavtala, stemme. Så blir stemmene talde opp i avdelingane og melde vidare til forbundet.

– Fellesforbundet har høg valdeltaking, noko som viser at medlemmene bryr seg. Å stemme er både ei plikt og ein rett. Det er viktig å delta uansett om du er einig eller ueinig, og ein må vere villig til å streike dersom ein stemmer nei, seier forbundssekretær Kine Asper Vistnes.

Tariffoppgjer er ein stor demokratisk prosess. Frå i fjor haust har klubbar, fagforeiningar og bransjar debattert årets tariffoppgjer, og forbundsstyret vedtok felles krav i slutten av januar. Det er viktig å vite kor skoen trykker, seier Vistnes.

– Det har stor betydning for forhandlingsstyrken at vi veit kva medlemmene stiller seg bak og kva som er dei reelle problemstillingane. Vi kan ikkje sitte på Lilletorget (forbundskontoret i Oslo, journ.mrk.) og konstruere krav. Da hadde vi fått trøbbel i uravstemminga og ein eventuell konflikt. Så enkelt er det.